Davlat xavfsizlik xizmatining Namangan viloyati bo‘yicha boshqarmasi xodimlari tomonidan o‘tkazilgan tezkor-qidiruv tadbirlari natijasida Toshkent shahri, Andijon va Namangan viloyatlaridagi yirik savdogar va tadbirkorlarning juda ko‘p miqdordagi xorijiy valyutalarini aylanma yo‘llar orqali Qirg‘izistonga o‘tkazish bilan shug‘ullanib kelgan jinoiy guruh faoliyatiga chek qo‘yildi, deb xabar beradi O‘zA.
Xususan, Andijon shahrida yashovchi, 1998 va 2002-yillarda tug‘ilgan ikki nafar shaxs 2023-yilning may oyida Toshkent shahrida juda ko‘p miqdordagi chet el valyutalarini qabul qilib olib, ularni jinoiy sheriklariga yetkazish uchun Farg‘ona viloyati tomon yo‘l olgan.
Yozyovon tumani hududida ular ushbu xorijiy valyutalarni Qirg‘izistonga bojxona nazoratini chetlab, o‘tkazishi kerak bo‘lgan Quvasoy shahrida yashovchi 24 yoshli fuqaro bilan uchrashgan vaqtlarida Davlat xavfsizlik xizmatining Namangan viloyati bo‘yicha boshqarmasi xodimlari tomonidan qo‘lga olingan.
Ular harakatlanib kelgan Spark rusumli avtomashina xolislar ishtirokida ko‘zdan kechirilganda, avtomashina salonida 4 dona qora rangli polietilen paketlarga o‘ralib, skotch bilan mahkamlangan jami 590 ming 945 AQSH dollari borligi aniqlanib, ashyoviy dalil sifatida rasmiylashtirib olingan.
Shuningdek, tezkor tadbir davom ettirilib, jinoiy guruh yetakchisi bo‘lgan Quvasoy shahrida yashovchi 42 yoshli shaxs ham qo‘lga olingan.
Holat yuzasidan Davlat xavfsizlik xizmatining Namangan viloyati bo‘yicha boshqarmasi Tergov bo‘limi tomonidan mazkur fuqarolarga nisbatan Jinoyat kodeksining 25, 182-moddasining (bojxona to‘g‘risidagi qonunchilikni buzish) 2-qismi “a” bandi bilan jinoyat ishi qo‘zg‘atilib, tergov harakatlari olib borilgan.
Natijada, jinoyat ishlari bo‘yicha Namangan tuman sudi tomonidan ushbu shaxslarning ikki nafariga nisbatan 5 yil, qolgan ikki nafariga nisbatan esa 5 yil 6 oy muddatga ozodlikdan mahrum qilish jazosi tayinlangan.
Shuningdek, ashyoviy dalil sifatida olingan pullar va Spark rusumli avtomashina davlat egaligiga o‘tkazilgan.
Izoh (0)