AQSH prezidenti Jo Bayden Rossiyaning muzlatilgan aktivlarini Ukraina foydasiga qisman musodara qilish g‘oyasini qo‘llab-quvvatladi. Bu haqda 10-yanvar kuni Bloomberg xabar berdi. AQSH Milliy Xavfsizlik kengashining Senat Tashqi aloqalar qo‘mitasiga yuborilgan noyabr oyidagi hisobotida ko‘rsatilishicha, Rossiya hujumidan keyin muzlatib qo‘yilgan taxminan 300 milliard dollarlik mablag‘ning bir qismi Ukrainaning tiklanishi uchun ishlatilishi mumkin.
Ushbu qonunchilik normasi “ijro etuvchi hokimiyatga Rossiya suveren aktivlarini Ukraina foydasiga musodara qilish uchun zarur bo‘lgan vakolatlarni beradi”, deyiladi Bloomberg jurnalistlari tomonidan ko‘rib chiqilgan hujjatda.
Bayden Rossiya aktivlarini musodara qilish g‘oyasini Kongressda Ukrainaga yordam bloklanganidan so‘ng qo‘llab-quvvatladi
Keyinchalik ta’kidlanishicha, Bayden Kongressdagi respublikachilar Ukraina qarshi hujumi bilan bog‘liq muammolar fonida Qo‘shma Shtatlarga juda katta moliyaviy yuk bo‘lishidan xavotirlanib, Kiyevga keyingi yordam uchun 60 milliard dollar miqdorida mablag‘ ajratilishini to‘sib qo‘ygach, Rossiya aktivlari musodara qilinishini qo‘llab-quvvatladi.
Agentlikka ko‘ra, Oq uy bu shubhalarni boshqa xavotirlar bilan muvozanatlashga harakat qilmoqda — Rossiya aktivlari musodara qilinishi AQSH moliya tizimi obro‘siga salbiy ta’sir ko‘rsatishi va dollardan qochishga sabab bo‘lishi mumkin. Bundan tashqari, Vashington bu qadamni G7 bo‘yicha ittifoqchilar bilan, xususan, yevropaliklar bilan muvofiqlashtirish niyatida, chunki Rossiya muzlatilgan aktivlari umumiy miqdorining taxminan 200 milliard dollari Yevropa Ittifoqi mamlakatlarida joylashgan.
G‘arb Rossiyaning muzlatilgan aktivlarini Ukrainaga o‘tkazish yo‘llarini qidirmoqda
Yevropa va Amerika Rossiyaning Ukrainaga keng ko‘lamli hujumi hamda g‘arbdagi Rossiya aktivlari muzlatib qo‘yilganidan so‘ng bu mablag‘larni Ukraina foydasiga musodara qilish yo‘llarini qidirmoqda, ushbu holat xalqaro huquqqa zid kelmaydi. 2023-yil yozida Yevropa Ittifoqi ishchi guruhi Rossiya aktivlarini musodara qilishning qonuniy yo‘li yo‘q, degan xulosaga keldi. Shundan so‘ng, YI olingan foydani Ukrainani qayta tiklashga o‘tkazish uchun muzlatilgan mablag‘larni qayta investitsiya qilish imkoniyatlarini o‘rganishga e’tibor qaratdi.
Izoh (0)