Afg‘onistonning Kobul va Mozori Sharif shaharlarida 11-yanvar kuni uchta portlash sodir bo‘ldi. Oqibatda bir necha kishi halok bo‘ldi va yaralandi. Bu haqda “Daryo”ning Afg‘onistondagi muxbiri xabar berdi.
Kobulda ikkita portlash yuz bergan, birinchisi Dasht Barchi hududida yuz bergan. Oqibatda ikki kishi halok bo‘lgan, yana 12 kishi jarohatlangan. Guvohlardan biri portlash hududida 10 dan ortiq odam jasadini ko‘rganini aytmoqda.
“Tolibon” noma’lum sababga ko‘ra portlashning bir necha guvohlarini voqea joyidan olib ketgan. Guvohlardan biri bir o‘zi besh o‘lik va 10 nafar yaradorni mashinaga olib ketgan. Hozircha hech kim yoki guruh mazkur portlash uchun javobgarlikni o‘z zimmasiga olmagan.
Ikkinchi portlashni “Afg‘oniston ozodlik fronti” zimmasiga olgan va “Tolibon” razvedkasi xodimlari nishonga olinganini aytgan. Portlashda “Tolibon”ning uch a‘zosi halok bo‘lgan, ikki nafari yaralangan. Afg‘oniston muvaqqat hukumati bu borada hech qanday ma’lumot bermagan.
Uchinchi portlash Balx viloyati markazi Mozori Sharif shahrida yuz bergan, kamida besh kishi jarohat olgan. Hodisaga mashinaga o‘rnatilgan mina sabab bo‘lgan.
6-yanvar kuni ham Dasht Barchi portlash yuz bergandi, jumladan, kichik avtobus portlatilgan. Hujum oqibatida ikki kishi halok bo‘lgan, yana 14 kishi jarohatlangan. Biroq, BMTning Afg‘onistondagi missiyasi (UNAMA) hodisada 25 kishini o‘lgani va yaralanganini ma’lum qildi. Ushbu portlash uchun javobgarlikni ISHID o‘z zimmasiga oldi.
9-yanvar kuni ham Kobul shahri sharqida portlash bo‘ldi, oqibatda uch kishi halok bo‘ldi, to‘rt kishi jarohatlandi. ISHID guruhi hujum uchun javobgarlikni o‘z zimmasiga oldi. Ta’kidlash joizki, so‘nggi paytlarda Afg‘oniston viloyatlarida portlashlar avvalgidan ham kuchaygan. Odamlar esa o‘z xavfsizligidan xavotirda.
Izoh (0)