Афғонистоннинг Кобул ва Мозори Шариф шаҳарларида 11 январь куни учта портлаш содир бўлди. Оқибатда бир неча киши ҳалок бўлди ва яраланди. Бу ҳақда “Дарё”нинг Афғонистондаги мухбири хабар берди.
Кобулда иккита портлаш юз берган, биринчиси Дашт Барчи ҳудудида юз берган. Оқибатда икки киши ҳалок бўлган, яна 12 киши жароҳатланган. Гувоҳлардан бири портлаш ҳудудида 10 дан ортиқ одам жасадини кўрганини айтмоқда.
“Толибон” номаълум сабабга кўра портлашнинг бир неча гувоҳларини воқеа жойидан олиб кетган. Гувоҳлардан бири бир ўзи беш ўлик ва 10 нафар ярадорни машинага олиб кетган. Ҳозирча ҳеч ким ёки гуруҳ мазкур портлаш учун жавобгарликни ўз зиммасига олмаган.
Иккинчи портлашни “Афғонистон озодлик фронти” зиммасига олган ва “Толибон” разведкаси ходимлари нишонга олинганини айтган. Портлашда “Толибон”нинг уч аъзоси ҳалок бўлган, икки нафари яраланган. Афғонистон муваққат ҳукумати бу борада ҳеч қандай маълумот бермаган.
Учинчи портлаш Балх вилояти маркази Мозори Шариф шаҳрида юз берган, камида беш киши жароҳат олган. Ҳодисага машинага ўрнатилган мина сабаб бўлган.
6 январь куни ҳам Дашт Барчи портлаш юз берганди, жумладан, кичик автобус портлатилган. Ҳужум оқибатида икки киши ҳалок бўлган, яна 14 киши жароҳатланган. Бироқ, БМТнинг Афғонистондаги миссияси (UNAMA) ҳодисада 25 кишини ўлгани ва яраланганини маълум қилди. Ушбу портлаш учун жавобгарликни ИШИД ўз зиммасига олди.
9 январь куни ҳам Кобул шаҳри шарқида портлаш бўлди, оқибатда уч киши ҳалок бўлди, тўрт киши жароҳатланди. ИШИД гуруҳи ҳужум учун жавобгарликни ўз зиммасига олди. Таъкидлаш жоизки, сўнгги пайтларда Афғонистон вилоятларида портлашлар аввалгидан ҳам кучайган. Одамлар эса ўз хавфсизлигидан хавотирда.
Изоҳ (0)