Veolia Energy Tashkent kompaniyasi poytaxtning ikki tumanidagi issiq suvda ko‘ringan qora zarrachalar bo‘yicha tushuntirish berdi.
Ma’lum qilinishicha, 3—4-yanvar kunlari Veolia Energy Tashkent MCHJ XK (“VET” MCHJ XK) hududiy boshqarmalariga, shuningdek, ijtimoiy tarmoqlar orqali “Toshkent issiqlik markazi” MCHJga (“TIM” MCHJ) qarashli 1-IM qozonxonasi hududida joylashgan isteʼmolchilardan issiq suvda loyqalik bilan qora zarralar mavjudligi yuzasidan shikoyatlar kelib tusha boshlagan.
Shu sababli “VET” MCHJ XK kimyo laboratoriyasi xodimlari tomonidan zudlik bilan 1-IM qozonxonasidan isteʼmolchilarga yetkazib berilayotgan issiq suv tahlili o‘tkazilgan.
Aniqlanishicha, 3-yanvarga o‘tar kechasi 1-IM qozonxonasida suvni tozalash filtridan sulfatlangan ko‘mir ajralib chiqqan. “VET” MCHJ XK isitish tarmoqlariga qozonxonadan sulfatlangan ko‘mir tushishi natijasida Mirzo Ulug‘bek va Yashnobod tumanlaridagi isteʼmolchilarning issiq suvlarida qora fraksiyalar (sulfoko‘mir) paydo bo‘lgan.
“Issiq suv parametrlari, rang va loyqalikdan tashqari, normal holatda. Sulfoko‘mir suvni filtrlashda ishlatiladi va isteʼmolchilar uchun xavf tug‘dirmaydi”, — deyiladi munosabatda.
“TIM” MCHJga qarashli 1-IM qozonxonasi xodimlari tomonidan issiqlik tarmoqlarida sulfatlangan ko‘mir oqimi bartaraf etilgan. Ayni paytda vaziyat qozonxona va “VET” MCHJ XK texnik xodimlari tomonidan nazoratga olingan.
Kompaniyaning ta’kidlashicha, issiq suv hisoblagichlari tiqilib qolgan taqdirda, “VET” MCHJ XK hisoblagichlarga (schetchiklarga) profilaktik xizmat ko‘rsatishga tayyor, agar kerak bo‘lsa, muhrlarni olib ifloslanishni bartaraf etgandan so‘ng qayta o‘rnatishga ham.
Shu bilan birga, isteʼmolchilardan issiq suv hisoblagichlaridagi plombalarni o‘zlari ochmasdan, “VET” MCHJ XK hududiy boshqarmalariga (Mirzo Ulug‘bek va Yashnobod tumanlari) murojaat qilish so‘raladi.
Izoh (0)