Тошкентнинг икки туманидаги иссиқ сувда кўринган қора заррачалар бўйича тушунтириш берилди

Veolia Energy Таshkent компанияси пойтахтнинг икки туманидаги иссиқ сувда кўринган қора заррачалар бўйича тушунтириш берди.

Маълум қилинишича, 3—4 январь кунлари Veolia Energy Таshkent МЧЖ ХК (“VET” МЧЖ ХК) ҳудудий бошқармаларига, шунингдек, ижтимоий тармоқлар орқали “Тошкент иссиқлик маркази” МЧЖга (“ТIМ” МЧЖ) қарашли 1-ИМ қозонхонаси ҳудудида жойлашган истеъмолчилардан иссиқ сувда лойқалик билан қора зарралар мавжудлиги юзасидан шикоятлар келиб туша бошлаган.

Шу сабабли “ВЕТ” МЧЖ ХК кимё лабораторияси ходимлари томонидан зудлик билан 1-ИМ қозонхонасидан истеъмолчиларга етказиб берилаётган иссиқ сув таҳлили ўтказилган.

Аниқланишича, 3 январга ўтар кечаси 1-ИМ қозонхонасида сувни тозалаш фильтридан сульфатланган кўмир ажралиб чиққан. “VЕТ” МЧЖ ХК иситиш тармоқларига қозонхонадан сульфатланган кўмир тушиши натижасида Мирзо Улуғбек ва Яшнобод туманларидаги истеъмолчиларнинг иссиқ сувларида қора фракциялар (сульфокўмир) пайдо бўлган.

“Иссиқ сув параметрлари, ранг ва лойқаликдан ташқари, нормал ҳолатда. Сульфокўмир сувни фильтрлашда ишлатилади ва истеъмолчилар учун хавф туғдирмайди”, — дейилади муносабатда.

“ТIМ” МЧЖга қарашли 1-ИМ қозонхонаси ходимлари томонидан иссиқлик тармоқларида сульфатланган кўмир оқими бартараф этилган. Айни пайтда вазият қозонхона ва “VЕТ” МЧЖ ХК техник ходимлари томонидан назоратга олинган.

Компаниянинг таъкидлашича, иссиқ сув ҳисоблагичлари тиқилиб қолган тақдирда, “VЕТ” МЧЖ ХК ҳисоблагичларга (счетчикларга) профилактик хизмат кўрсатишга тайёр, агар керак бўлса, муҳрларни олиб ифлосланишни бартараф этгандан сўнг қайта ўрнатишга ҳам.

Шу билан бирга, истеъмолчилардан иссиқ сув ҳисоблагичларидаги пломбаларни ўзлари очмасдан, “VЕТ” МЧЖ ХК ҳудудий бошқармаларига (Мирзо Улуғбек ва Яшнобод туманлари) мурожаат қилиш сўралади.