Toshkent shahar Mirobod tumanining ayrim ko‘chalarida issiq suv taʼminoti bir necha kun davomida bo‘lmaydi. Bu haqda tuman hokimligi matbuot xizmati xabar berdi.
Qayd etilishicha, Mirobod tumani Nukus—Oybek ko‘chasi kesishmasida joylashgan issiq suv quvurlarida 7-oktyabr kuni avariya holati yuz bergan.
Veolia Energy Tashkent Mirobod tumani bo‘limi tomonidan hozirgi kunda uzunligi 698 metr bo‘lgan diametri 700 millimetr magistral issiqlik quvurlari kuz-qish mavsumini betalafot o‘tkazish uchun butunlay yangisiga almashtirilmoqda.
Shu tufayli Oybek ko‘chasi bo‘ylab joylashgan №40, 42, 44, 46, 48, 50, 55, 57, 59, 61, 63-raqamli ko‘p qavatli uylar, shuningdek, Nukus ko‘chasida joylashgan №37-uy, Xonzodabegim ko‘chasidagi №3,9, T.Shevchenko ko‘chasidagi №12, 64 uyda issiq suv taʼminoti 7-oktyabrda o‘chirilgan.
Yuqorida sanab o‘tilgan manzillarda issiq suv taʼminoti ish tugashi bilanoq (taxminan 20-oktyabrda) tiklanadi.
Veolia Energy Tashkent isteʼmolchilardan keltirilgan noqulayliklar uchun uzr so‘raydi.
Avvalroq Bektemir va Uchtepa tumanlarida tabiiy gaz yetkazib berish, shuningdek, Sergeli va Bektemir tumanlarida elektr energiyasi ta’minoti vaqtincha to‘xtatilishi to‘g‘risida xabar berilgandi. Oktyabr boshida esa Mirzo Ulug‘bek, Yashnobod, Bektemir tumanlarining qator manzillarida issiq suv taʼminoti vaqtincha to‘xtatilgandi.
Izoh (0)