Namangan viloyat bojxona boshqarmasi tomonidan DXX, IIB va Milliy gvardiya bilan hamkorlikda Chust tumanida tezkor tadbir o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Foto: Namangan viloyat bojxona boshqarmasi
Tezkor tadbir davomida Namangan—Chust yo‘nalishida harakatlanib kelayotgan Nexia rusumli avtotransport vositasi Chust tumani, “Zarafshon” mahallasida to‘xtatilib, xolislar ishtirokida ko‘zdan kechirildi. Avtomashina salonida xorijda ishlab chiqarilgan, muqaddam bojxona nazorati o‘rnatilmagan aylanma yo‘llar orqali olib kirilgan, aksiz marka bilan markalanmagan umumiy qiymati 112 500 000 so‘mlik 7500 quti tamaki mahsulotlari borligi aniqlandi.
Shundan so‘ng tezkor tadbir davom ettirilib, Yangi Namangan tumanida yashovchi fuqaroning yashash xonadoni ko‘zdan kechirilganida xonadon yerto‘lasida xorijda ishlab chiqarilgan, aylanma yo‘llar orqali olib o‘tilgan, markalanmagan umumiy qiymati 23 150 000 so‘mlik 13 turdagi jami 8210 dona tamaki mahsulotlari borligi aniqlandi.
Hozirda mazkur holat yuzasidan surishtiruv harakatlari olib borilmoqda.
Izoh (0)