Bir haftada Binance kriptobirjasidan 2 mlrd dollardan oshiq mablag‘ chiqib ketdi

Dunyodagi eng yirik kriptovalyuta birjasi Binance treyderlar mablag‘larining katta miqdorda chiqib ketishiga duch kelmoqda. 

The Wall Street Journal nashrining Nansen tahliliy kompaniyasi ma’lumotlariga tayanib yozishicha, o‘tgan haftada foydalanuvchilar birjadan 2,1 milliard dollar olib chiqishgan.

Foydalanuvchi mablag‘larining chiqib ketishi birjada so‘nggi paytlarda yuzaga kelgan muammolar bilan bog‘liq.

Shunday qilib, o‘tgan haftada Binance dasturiy ta’minotdagi xato tufayli bir necha soatga spot savdolarni, depozitlarni va pul mablag‘larini olishni to‘xtatishga majbur bo‘ldi. 

Kecha, 28-mart kuni esa AQSH tovar fyucherslari savdo komissiyasi (CFTC) Binance, uning asoschisi va bosh direktori Changpeng Chjao, shuningdek, sobiq top-menejer Samuel Lim ustidan sudga murojaat qildi. 

Regulyator ularni AQSHning qator qonun-qoidalarini, jumladan, pul yuvishga qarshi kurashga qaratilgan qoidalarni buzganlikda ayblaydi.

Nansenning so‘zlariga ko‘ra, amerikalik regulyatorning da’vo arizasi haqida rasmiy e’lon qilinishidan bir necha soat oldin foydalanuvchilar birjadan 850 million dollar yechib olishgan. Da’vo e’lon qilingandan keyin esa yana 240 million dollar. 

Bu Binance’dan foydalanuvchi mablag‘larining birinchi ommaviy chiqishi emas. Oxirgi marta mijozlar o‘z pullarini birjadan 13 dekabrda ommaviy ravishda olib ketishgan. 

Binance hozirda 63 milliard dollarlik kriptovalyuta aktivlarini nazorat qiladi.