Samarqandda o‘zganing Cobalt avtomobilini minib qochgan shaxs qo‘lga olindi, deb xabar beradi YHXX axborot xizmati.
Qayd etilishicha, 31-dekabr kuni soat 00:30 larda fuqaro Samarqand viloyati IIB “102” qisqa raqamiga qo‘ng‘iroq qilib, Cobalt rusumli transport vositasini Samarqand shahri Rudakiy ko‘chasida joylashgan “Registon” o‘quv markazi oldida, yo‘l chetida ochiq holatda qoldirib, qarama-qarshi tomonda joylashgan kafega kirgan vaqtida noma’lum shaxs uni olib qochib ketganini bildirgan.
Samarqand shahri bo‘yicha IIO FMB YHXB va sohaviy xizmat xodimlari tomonidan olib borilgan tezkor qidiruv ishlari natijasida Cobalt avtomobili hamda uni olib qochgan shaxs topilgan.
“Yangi yilni nishonlash munosabati bilan o‘tirish tashkillashtirdik. O‘tirishda ko‘proq spirtli ichimlik iste’mol qilib qo‘ydim… Ochiq Cobalt avtomobilini olib qochdim. Ertalab soat 07:00 larda o‘zimga kelganimda mashina ichida edim. Mashinani tashlab, ko‘chaga chiqib, taksi ushladim. Qilgan ishimdan pushaymonman”, — deydi qonunbuzar shaxs.
Mashinani olib qochgan shaxsga nisbatan Jinoyat kodeksining 267-modda (transport vositasini olib qochish) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Eslatib o‘tamiz, 2023-yil iyul boshlarida Toshkentda o‘zi ishlaydigan avtomobil yuvish shohobchalarining biridan Gentra’ni olib qochgan fuqaroni ushlash uchun to‘pponchadan o‘q uzilgandi.
Izoh (0)