Самарқандда маст фуқаро ўзганинг Cobalt’ини миниб қочди

Самарқандда ўзганинг Cobalt автомобилини миниб қочган шахс қўлга олинди, деб хабар беради ЙҲХХ ахборот хизмати.

Қайд этилишича, 31 декабрь куни соат 00:30 ларда фуқаро Самарқанд вилояти ИИБ “102” қисқа рақамига қўнғироқ қилиб, Cobalt русумли транспорт воситасини Самарқанд шаҳри Рудакий кўчасида жойлашган “Регистон” ўқув маркази олдида, йўл четида очиқ ҳолатда қолдириб, қарама-қарши томонда жойлашган кафега кирган вақтида номаълум шахс уни олиб қочиб кетганини билдирган.

Самарқанд шаҳри бўйича ИИО ФМБ ЙҲХБ ва соҳавий хизмат ходимлари томонидан олиб борилган тезкор қидирув ишлари натижасида Cobalt автомобили ҳамда уни олиб қочган шахс топилган.

“Янги йилни нишонлаш муносабати билан ўтириш ташкиллаштирдик. Ўтиришда кўпроқ спиртли ичимлик истеъмол қилиб қўйдим… Очиқ Cobalt автомобилини олиб қочдим. Эрталаб соат 07:00 ларда ўзимга келганимда машина ичида эдим. Машинани ташлаб, кўчага чиқиб, такси ушладим. Қилган ишимдан пушаймонман”, — дейди қонунбузар шахс.

Машинани олиб қочган шахсга нисбатан Жиноят кодексининг 267-модда (транспорт воситасини олиб қочиш) 1-қисми билан жиноят иши қўзғатилиб, дастлабки тергов ҳаракатлари олиб борилмоқда.

Эслатиб ўтамиз, 2023 йил июль бошларида Тошкентда ўзи ишлайдиган автомобиль ювиш шоҳобчаларининг биридан Gentra’ни олиб қочган фуқарони ушлаш учун тўппончадан ўқ узилганди.