Jizzax viloyatida o‘zganing Gentra avtomobilini olib qochgan shaxslar ushlandi, deb xabar beradi viloyat IIB axborot xizmati.
Qayd etilishicha, 8-iyulga o‘tar kechasi Zafarobod tumani “Bo‘ston” mahallasi Shifokorlar ko‘chasida istiqomat qiluvchi 1985-yilda tug‘ilgan fuqaroning yashash uyi oldida turgan Gentra rusumli avtomobil yo‘qolgan.
Jabrlanuvchi soat 02:30 da bu haqda Jizzax viloyati IIBga xabar bergan. Ma’lum qilinishicha, noma’lum shaxs avtomobilni 23:00 dan 02:30 gacha bo‘lgan vaqt oralig‘ida olib qochgan.
Ushbu xabar asosida viloyat IIO xodimlari tomonidan tezkor tadbirlar amalga oshirilgan. Olib borilgan surishtiruvlar davomida mashina soat 03:40 larda Jizzax shahri hududidan o‘tgan Islom Karimov ko‘chasida harakatlanib ketayotganida to‘xtatilgan.
Surishtiruvlar davomida Gentra’ni jabrlanuvchining birga yashovchi jiyani — 17 yoshli qiz hamda tumanning “Uzun” mahallasida yashovchi 18 yoshli yigit birgalikda minib ketgani ma’lum bo‘lgan.
Iyul boshlarida Toshkentda o‘zi ishlaydigan avtomobil yuvish shahobchalarining biridan Gentra’ni olib qochgan fuqaroni ushlash uchun to‘pponchadan o‘q uzilgandi.
Izoh (0)