Amerika Qo‘shma Shtatlarining sobiq prezidenti va tadbirkor Donald Tramp o‘zining Truth Social ijtimoiy tarmog‘ida maʼlum qilishicha, “Uyda yolg‘iz-2” filmi ijodkorlari undan epizod rolni o‘ynashni iltimos qilgan.
“Ular menga tegishli Nyu-Yorkdagi Plaza mehmonxonasini ijaraga olishgan edi. Men juda ham band edim va filmda suratga tushishni xohlamaganman. Prodyuserlar juda ham xushmuomala edi, shu bilan birga, qatʼiyatli ham. Men oxiri rozi bo‘ldim”, — deydi Tramp.
Biznesmenning so‘zlariga ko‘ra, uning Kevinga yo‘lni ko‘rsatib yuborgan bir necha soniyali epizodi filmning muvaffaqiyatli bo‘lganiga yordam bergan. “Film televizorda namoyish etilsa, hanuzgacha odamlar menga telefon qiladi”, — deya qo‘shimcha qildi u.
2021-yilda film rejissori Kris Kolambus jurnalistlar bilan uchrashuvda umuman boshqa versiyani aytgan edi. Film ijodkorlari mehmonxonadan foydalanish uchun pul to‘lamoqchi bo‘lgan, lekin Tramp binodan foydalanishning yagona yo‘li unga filmdan rol berish ekanini aytgan.
“Filmning yopiq taqdimotida odamlar Trampni ekranda ko‘rib, xursand bo‘lib ketishdi, shuning uchun men uning epizodini qoldirishni aytdim. Lekin baribir u filmdagi ushbu epizodni tazyiq yo‘li bilan qo‘lga kiritgan”, — deydi rejissor.
Izoh (0)