Америка Қўшма Штатларининг собиқ президенти ва тадбиркор Дональд Трамп ўзининг Truth Social ижтимоий тармоғида маълум қилишича, “Уйда ёлғиз-2” фильми ижодкорлари ундан эпизод ролни ўйнашни илтимос қилган.
“Улар менга тегишли Нью-Йоркдаги Plaza меҳмонхонасини ижарага олишган эди. Мен жуда ҳам банд эдим ва фильмда суратга тушишни хоҳламаганман. Продюсерлар жуда ҳам хушмуомала эди, шу билан бирга, қатъиятли ҳам. Мен охири рози бўлдим”, — дейди Трамп.
Бизнесменнинг сўзларига кўра, унинг Кевинга йўлни кўрсатиб юборган бир неча сонияли эпизоди фильмнинг муваффақиятли бўлганига ёрдам берган. “Фильм телевизорда намойиш этилса, ҳанузгача одамлар менга телефон қилади”, — дея қўшимча қилди у.
2021 йилда фильм режиссёри Крис Коламбус журналистлар билан учрашувда умуман бошқа версияни айтган эди. Фильм ижодкорлари меҳмонхонадан фойдаланиш учун пул тўламоқчи бўлган, лекин Трамп бинодан фойдаланишнинг ягона йўли унга фильмдан рол бериш эканини айтган.
“Фильмнинг ёпиқ тақдимотида одамлар Трампни экранда кўриб, хурсанд бўлиб кетишди, шунинг учун мен унинг эпизодини қолдиришни айтдим. Лекин барибир у фильмдаги ушбу эпизодни тазйиқ йўли билан қўлга киритган”, — дейди режиссёр.
Изоҳ (0)