Shvetsiya hukumati Turkiyaga mudofaa mahsulotlarini sotishga qo‘yilgan embargoni 2022-yildayoq bekor qilgan. Bu haqda Turkiya tashqi ishlar vaziri o‘rinbosari Burak Akchapar ma’lum qildi, deb yozmoqda Yeni Shafak gazetasi.
Taqiq Shvetsiyaning NATOga kirishi bo‘yicha muzokaralar boshlanganidan so‘ng olib tashlangan. Turkiya Shvetsiyaning alyansga a’zo bo‘lishiga qarshi chiqib, mamlakat oldiga bir qancha shartlar qo‘ygandi. Ulardan biri 2019-yilda joriy etilgan shved qurol-yarog‘ini yetkazib berishga qo‘yilgan embargoni bekor qilishdir.
2023-yil 26-dekabr kuni Turkiya parlamentining Tashqi ishlar komissiyasi ko‘pchilik ovoz bilan Shvetsiyaning NATOga a’zo bo‘lishi haqidagi protokolni ma’qulladi.
“Shvetsiya Turkiya uchun mudofaa mahsulotlariga qo‘yilgan embargoni bekor qilgan. Shvetsiyaning (NATOga aʼzo bo‘lish jarayoni boshlanganidan so‘ng) turk kompaniyalari tomonidan taqdim etilgan arizalar maʼqullangan”, — dedi Akchapar.
Shvetsiyaning Shimoliy Atlantika alyansiga qabul qilinishi haqidagi ratifikatsiya protokoli endi mamlakat parlamenti bo‘lmish Turkiya Oliy millat majlisi Bosh assambleyasida umumiy ovoz berishdan o‘tishi kerak. Ovoz berish sanasi hozircha noma’lum.
Yakunda hujjat Turkiya prezidenti Rajab Toyyib Erdo‘g‘on tomonidan imzolanganidan so‘ng kuchga kiradi.
2023-yil oktyabr oyi oxirida Turkiya rahbari Shvetsiyaning NATOga a’zo bo‘lish haqidagi arizasini ma’qulladi va Turkiya parlamentiga protokol yubordi.
Shvetsiya rasmiylari alyansga qo‘shilish uchun 2022-yil may oyida ariza topshirgan. Dastlab Anqara bunga qarshi chiqqan. Turkiya hukumati Anqarada terrorchi tashkilot deb hisoblangan Kurdiston Ishchilar partiyasi tarafdorlarini ekstraditsiya qilishni va 2019-yilda kiritilgan Turkiyaga qurol sotishga taqiqni bekor qilishni talab qildi.
Shvetsiyaning arizasini NATO a’zolaridan faqat Vengriya va Turkiya ratifikatsiya qilmagan. Budapesht o‘z pozitsiyasini Stokgolm doimiy ravishda ikki tomonlama munosabatlarga putur yetkazishi va o‘zini “ma’naviy ustun” tutishga urinishi bilan izohlagan.
Izoh (0)