Швеция ҳукумати Туркияга мудофаа маҳсулотларини сотишга қўйилган эмбаргони 2022 йилдаёқ бекор қилган. Бу ҳақда Туркия ташқи ишлар вазири ўринбосари Бурак Акчапар маълум қилди, деб ёзмоқда Yeni Shafak газетаси.
Тақиқ Швециянинг НАТОга кириши бўйича музокаралар бошланганидан сўнг олиб ташланган. Туркия Швециянинг альянсга аъзо бўлишига қарши чиқиб, мамлакат олдига бир қанча шартлар қўйганди. Улардан бири 2019 йилда жорий этилган швед қурол-яроғини етказиб беришга қўйилган эмбаргони бекор қилишдир.
2023 йил 26 декабрь куни Туркия парламентининг Ташқи ишлар комиссияси кўпчилик овоз билан Швециянинг НАТОга аъзо бўлиши ҳақидаги протоколни маъқуллади.
“Швеция Туркия учун мудофаа маҳсулотларига қўйилган эмбаргони бекор қилган. Швециянинг (НАТОга аъзо бўлиш жараёни бошланганидан сўнг) турк компаниялари томонидан тақдим этилган аризалар маъқулланган”, — деди Акчапар.
Швециянинг Шимолий Атлантика альянсига қабул қилиниши ҳақидаги ратификация протоколи энди мамлакат парламенти бўлмиш Туркия Олий миллат мажлиси Бош ассамблеясида умумий овоз беришдан ўтиши керак. Овоз бериш санаси ҳозирча номаълум.
Якунда ҳужжат Туркия президенти Ражаб Тоййиб Эрдўғон томонидан имзоланганидан сўнг кучга киради.
2023 йил октябрь ойи охирида Туркия раҳбари Швециянинг НАТОга аъзо бўлиш ҳақидаги аризасини маъқуллади ва Туркия парламентига протокол юборди.
Швеция расмийлари альянсга қўшилиш учун 2022 йил май ойида ариза топширган. Дастлаб Анқара бунга қарши чиққан. Туркия ҳукумати Анқарада террорчи ташкилот деб ҳисобланган Курдистон Ишчилар партияси тарафдорларини экстрадиция қилишни ва 2019 йилда киритилган Туркияга қурол сотишга тақиқни бекор қилишни талаб қилди.
Швециянинг аризасини НАТО аъзоларидан фақат Венгрия ва Туркия ратификация қилмаган. Будапешт ўз позициясини Стокгольм доимий равишда икки томонлама муносабатларга путур етказиши ва ўзини “маънавий устун” тутишга уриниши билан изоҳлаган.
Изоҳ (0)