Namanganda fuqaroning xonadonida 500 mln so‘mlik pirotexnika vositalari yashirib qo‘yilgani aniqlandi

Namangan viloyat bojxona boshqarmasi kontrabandaga qarshi kurash bo‘limi DXX va IIB xodimlari bilan birgalikda Yangiqo‘rg‘on tumanida tezkor tadbir o‘tkazdi. Bu haqda “Daryo” muxbiri Azizbek Abduvaliyev xabar bermoqda.

Tezkor tadbir davomida shu tumandagi “Yumaloqtepa” mahallasida yashovchi fuqaroning xonadoni ko‘zdan kechirilganda xorijda ishlab chiqarilgan, mamlakatga muqaddam noqonuniy ravishda olib kirilgan 396 000 dona “Treniya” va 458 dona “7 Shots” nomli pirotexnika vositalari saqlanayotganligi aniqlandi.

Ularning umumiy qiymati 500 million so‘m baholanmoqda. Manbalarga ko‘ra, mazkur summa va miqdordagi pirotexnika vositalari hozirgi kunda respublikadagi rekord ko‘rsatkich hisoblanadi.

Hozirda mazkur holat yuzasidan surishtiruv ishlari olib borilmoqda.