Joriy yilning 21-dekabr kuni “Daryo” internet-nashrida “Mediapark servis xizmati yo‘q televizor sotmoqda. Bu xaridorni aldashmi yoki ustidan kulish?” sarlavhali maqola chop etildi. Unda jurnalist hamkasblarimizdan biri poytaxtdagi Mediapark do‘konidan Samsung televizorini sotib olib, g‘aroyib sarguzashtlarga duch kelgani hikoya qilingan.
Xususan, 15 million so‘mga xarid qilingan televizor pultining pastga bosiladigan tugmasi o‘z-o‘zidan ishdan chiqqanda, u Samsung rasmiy servis markaziga murojaat qiladi. Ammo servisdagilar Mediapark’dan xarid qilingan bu televizor O‘zbekiston uchun norasmiy hisoblanishi, shuning uchun ular bu mahsulot uchun kafolatli bepul servis xizmatini ko‘rsata olmasligini ma’lum qiladi.
Mazkur holat bo‘yicha Mediapark rasmiy munosabat bildirib o‘tdi. Unga ko‘ra, maqolada keltirilgan mahsulot O‘zbekiston Respublikasi hududida foydalanishga muvofiqlik sertifikatiga ega va qonuniy import qilingan.
“Mijozga rasmiy Samsung servis markazlarining kafolatlangan servis xizmatini ko’rsatishni rad etish holati Samsung Electronics Uzbekistan MCHJ XKning ichki kompyuter tizimidagi texnik xatolik natijasida yuzaga kelgan.
Rasmiy servis xodimlari o‘z tizimlaridagi nosozlikdan bexabar ma’lumot bergan. Bu bo‘yicha Samsung Electronics Uzbekistan MCHJ XK keltirilgan noqulaylik uchun rasmiy uzr so‘ragan”, — deyiladi Mediapark munosabatida.
Shuningdek, ular o‘z mijoziga g‘amxo‘rlik ko‘rsatgan holda ishlamay qolgan mahsulot pultini bepul almashtirib berishlarini ham ta’kidlab o‘tishgan.
“Daryo” internet-nashri yuzaga kelgan vaziyatga oydinlik kiritgani va iste’molchi huquqi tiklanishi uchun tegishli sa’y-harakatlarni amalga oshirgani uchun Mediapark do‘koniga minnatdorlik bildirib o‘tadi.
Izoh (0)