Eron “Tolibon” harakatidan Buyuk Britaniya bilan hamkorlik qilgan afg‘onlar ro‘yxatini ulashishni so‘radi. Bu ro‘yxat Qo‘shma Qirollik Mudofaa vazirligidagi axborot sizib chiqishi natijasida qo‘lga kiritilgan. Bu haqda The Daily Telegraph gazetasi o‘z manbalariga asoslanib ma’lum qildi.
Ma’lum bo‘lishicha, tasodifiy axborot siqib chiqishi natijasida 2021-yil avgustida toliblar hokimiyatga kelishidan oldin London bilan yaqindan hamkorlik qilgan 25 mingga yaqin afg‘onning shaxsiy ma’lumotlari oshkor bo‘lgan. Buyuk Britaniya hukumati 2022-yilda yuz bergan bu voqea haqida faqat 2023-yil avgustda xabar topgan va Afg‘onistonda qolayotgan bu odamlarni qirollikka ustuvor tarzda ko‘chirish dasturini ishga tushirgan. Bundan tashqari, 100 dan ortiq britaniyalik, jumladan, MI6 tashqi razvedka xizmati va maxsus kuchlar xodimlarining shaxsiy ma’lumotlari ham oshkor bo‘lgan.
Ma’lumotlarning siqib chiqishiga Buyuk Britaniya Mudofaa vazirligi xodimining maxfiy ma’lumotlar yozilgan xatni xato ravishda chetdagi elektron pochtaga yuborishi sabab bo‘lgan.
Xabarga ko‘ra, Tehron mazkur ro‘yxatdan o‘z atom dasturi bo‘yicha muzokaralarda “ayirboshlash vositasi” sifatida foydalanmoqchi. Ta’kidlanishicha, hujjatda Birlashgan Qirollikdan boshpana so‘rab murojaat qilgan afg‘onlar, jumladan, Britaniya armiyasida xizmat qilgan harbiylar va maxsus xizmatlar axborotchilarining ismlari keltirilgan. Ularning ba’zilari keyinchalik Eronga qochib ketgan.
Ta’kidlanishicha, ushbu ro‘yxatdagi kamida bir kishi allaqachon Erondan Afg‘onistonga chiqarib yuborilgan, bu esa ikki davlatning ushbu masala bo‘yicha hamkorligi boshlangani dalolatidir.
“Avgust oyi oxirida Eronga qarshi Yevropa sanksiyalari qayta tiklanishidan oldin bunday odamlarni iloji boricha ko‘proq topib, ulardan yashirin muzokara vositasi sifatida foydalanish kerak”, dedi nashrga Eronning yuqori martabali amaldorlaridan biri.
Bugungi kunga qadar 4,5 mingga yaqin afg‘on ma’lumotlar siqib chiqqanidan so‘ng xavfsizlik maqsadida Buyuk Britaniyaga olib ketilgan. Keyinchalik ularning soni 7 mingtaga yetishi taxmin qilinmoqda. Umuman olganda, xalqaro qo‘shinlar Afg‘onistondan olib chiqilganidan beri 30 mingdan ortiq afg‘on qirollikka ko‘chib o‘tgan.
25-iyul Eron, Fransiya, Germaniya va Buyuk Britaniya Istanbulda yadroviy muzokaralar o‘tkazdi. Ushbu Yevropa davlatlari so‘nggi kunlarda Tehronga qarshi xalqaro sanksiyalar qayta joriy etilishidan ogohlantirib kelayotgandi.
Izoh (0)