26-dekabrga o‘tar kechasi Ukraina Qurolli kuchlari Feodosiya portiga hujum qildi, dedi anneksiya qilingan Qrim rahbari Sergey Aksenov.
“Feodosiya tumanida dushman hujumi amalga oshirildi. Port hududi o‘rab olingan. Ayni paytda portlash to‘xtatilgan va yong‘in o‘rab olingan. Zonada barcha tegishli xizmatlar ishlamoqda. Bir necha uyning aholisi ko‘chiriladi. Vaziyatni shaxsan nazorat qilyapman. Sizdan xotirjam bo‘lishingizni va faqat rasmiy ma’lumotlarga ishonishingizni so‘rayman”, — deb yozdi u kechasi Telegram’dagi kanalida.
Keyinroq Aksenov Feodosiyadagi hujumda bir kishi halok bo‘lgani, yana ikki kishi yaralangani haqida xabar berdi. Oltita bino shikastlangan.
Ijtimoiy tarmoqlarda voqea guvohlarining portlash aks etgan videolari paydo bo‘ldi.
Ukraina Qurolli kuchlari Harbiy havo kuchlari qo‘mondonligi Ukraina taktik aviatsiyasi Feodosiya tumanida Rossiya Qora dengiz flotining “Novocherkassk” yirik desant kemasini portlatib yuborganini ma’lum qildi. Harbiy maʼlumotlarga ko‘ra, qanotli raketa hujumi mahalliy vaqt bilan 02:30 atrofida amalga oshirilgan. Taxminlarga ko‘ra, kema Rossiya tomonidan Ukrainaga hujum qilishda foydalanilgan Shahed hujumchi dronlarini Erondan Qrimga yetkazgan.
“Rossiyadagi flot kichrayib bormoqda! Rossiya Qora dengiz flotining flagmani bo‘lgan “Moskva” kreyseri ortidan bu safar “Novocherkassk” yirik desant kemasi bormoqda. Harbiy havo kuchlari uchuvchilari va operatsiyada ishtirok etgan barchaga puxta mehnati uchun minnatdorlik bildiraman”, — deb yozdi Ukraina Qurolli kuchlari Harbiy-havo kuchlari qo‘mondoni, general-leytenant Nikolay Oleshuk Telegram’da.
Rossiya Mudofaa vazirligi Feodosiyadagi “Novocherkassk” kemasiga zarar yetkazilgani haqidagi ma’lumotni tasdiqladi. Vazirlik maʼlumotlariga ko‘ra, Ukraina Qurolli kuchlari kemaga aviatsion boshqariladigan raketalar bilan hujum qilgan. Mudofaa vazirligining qo‘shimcha qilishicha, zenit jangi paytida havo hujumidan mudofaa tizimlari Ukrainaning ikkita Su-24 samolyotini yo‘q qilgan.
-SdczsORp.jpg)
Feodosiyaga hujumdan tashqari, Ukraina harbiy-havo kuchlari 26-dekabrga o‘tar kechasi Rossiya harbiylari tomonidan uchirilgan 19 ta drondan 13 tasini yo‘q qilgani haqida xabar berdi. Odessa, Xerson, Nikolayev va Xmelnitskiy viloyatlarida hujumchi dronlar urib tushirildi.
2022-yil mart oyida Ukraina Qurolli kuchlari bosib olingan Berdyansk portiga havo hujumi uyushtirgandi. O‘shanda ukrainalik harbiylar Rossiya Qora dengiz flotining yirik “Saratov” desant kemasini yo‘q qilganini, shuningdek, “Sezar Kunikov” va “Novocherkassk” desant kemalariga zarar yetkazganini e’lon qildi.
Ukraina Qurolli kuchlarining Rossiya Qora dengiz floti joylashgan Sevastopolga bir qator hujumlaridan so‘ng flot kemalarining bir qismi Feodosiya portiga o‘tkazildi.
Izoh (0)