Buxoroda aholiga imtiyozli narxda sotilishi kerak bo‘lgan 800 tonnadan ortiq ko‘mir talon-toroj qilingani aniqlandi, deb xabar beradi Bosh prokuratura huzuridagi departament.
Qayd etilishicha, qish mavsumida aholining yoqilg‘i mahsulotlariga bo‘lgan ehtiyojini qondirish maqsadida Davlat xavfsizlik xizmati xodimlari tomonidan Iqtisodiy jinoyatlarga qarshi kurashish departamenti bilan hamkorlikda Buxoro viloyatida o‘tkazilgan tekshiruvlar natijasida, bir nechta tumanlarda ko‘mir mahsulotlari talon-toroj qilingani aniqlangan.
Xususan, “Ko‘mir taʼminot” MCHJning Buxoro viloyat filiali Vobkent ko‘mir omborida Vazirlar Mahkamasining 2022-yil 29-sentyabrdagi 551-sonli qarori bilan tasdiqlangan “Respublika aholisini ko‘mir mahsulotlari bilan taʼminlash tartibi to‘g‘risida”gi nizom talablariga muvofiq, aholiga imtiyozli narxda yetkazib berilishi kerak bo‘lgan 455,7 tonna, Olot ko‘mir omborida 205,3 tonna, Qorako‘l ko‘mir omborida 78 tonna, Jondor ko‘mir omborida esa 67,4 tonna ko‘mir noqonuniy sotib yuborilgani maʼlum bo‘ldi.
Hozirda mazkur ko‘mir omborlarining mansabdor shaxslari va boshqalarga nisbatan Jinoyat kodeksining 167-moddasi 2-qismi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari olib borilmoqda.
Avvalroq Buxoro shahri “Abu Ali ibn Sino” MFY hokim yordamchisi kredit mablag‘larini o‘zlashtirganlikda ayblanib, jinoyat ishi qo‘zg‘atilgani, Yangiyo‘l tumani hokimi mahallalardagi 6 nafar yordamchisini jazolagani to‘g‘risida xabar berilgandi.
Izoh (0)