O‘zbekistonda “Milliy seriallar ishlab chiqarish konsepsiyasi” ishlab chiqiladi. Bu haqda 22-dekabr kuni Shavkat Mirziyoyev raisligida bo‘lib o‘tgan Respublika Ma’naviyat va ma’rifat kengashi yig‘ilishida ma’lum qilindi.
“Savol tug‘iladi: xalqimiz televizorni eng ko‘p ko‘radigan paytlarda, ya’ni, praym-taym vaqtida xorijiy seriallarga katta o‘rin berayotganimiz qanchalik to‘g‘ri? Bu oldimizga kechiktirib bo‘lmaydigan dolzarb vazifalarni qo‘ymoqda. Jumladan, milliy seriallar ishlab chiqarish bo‘yicha mavjud tizimni tubdan isloh etish, bu yo‘nalishda ijodkorlarimizni qo‘llab-quvvatlash lozim”, — degan davlat rahbari yig‘ilishda.
Prezident matbuot kotibining xabar qilishicha, yig‘ilishda milliy seriallarni g‘oyaviy-badiiy va texnik jihatdan jozibali, hamma qiziqib ko‘radigan darajaga yetkazish zarurligi ta’kidlandi.
Shu maqsadda “Milliy seriallar ishlab chiqarish konsepsiyasi” ishlab chiqiladi. Unda, avvalambor, mahalliy ijodkorlarga, xususan, ijrochi san’atkorlar, dramaturg va rejissyorlar uchun zamonaviy sharoitlar yaratishga alohida e’tibor qaratiladi.
Buning uchun erkin iqtisodiy zona — Cinema Park tashkil qilish lozimligi ko‘rsatib o‘tildi. Vazirlar Mahkamasiga Cinema Park uchun davlat-xususiy sheriklik asosida Toshkent viloyati hududidan 50 gektar yer maydoni ajratish bo‘yicha taklif kiritish topshirildi.
Buxoro, Samarqand, Toshkent viloyatlari hokimlariga o‘z viloyatlarida “erkin iqtisodiy kinohududlar” barpo etish bo‘yicha loyihalarni boshlash topshirildi.
Buyuk ajdodlarning ibratli hayot yo‘li haqida ko‘p qismli animasion filmlar yaratishni ham nazarda tutish lozimligi ko‘rsatib o‘tildi.
Izoh (0)