“O‘zgidromet” dam olish kunlari qanday ob-havo bo‘lishini ma’lum qildi

“O‘zgidromet” 22—24-dekabr kunlariga ob-havo prognozini e’lon qildi.

Unga ko‘ra, 22-dekabr va 23—24-dekabr kunlari O‘zbekiston hududiga janubdan iliq havo kirib kelishi davom etadi va harorat ko‘tariladi.

Juma kuni kunning ikkinchi yarmida havo 8-13 daraja iliqqacha, shanba va yakshanba kunlari esa 12-17 daraja iliqqacha isiydi. Kechalari ham havo iliq bo‘ladi, yakshanba kuniga kelib harorat kechasi 2-7 daraja iliqqacha ko‘tariladi.

Bu kunlarda havo biroz bulutli bo‘ladi, ba’zi joylarda o‘zgarib turadi, yog‘ingarchilik kutilmaydi. Faqat ayrim tog‘oldi va tog‘li hududlarda 24-dekabr, yakshanba kuni asosan yomg‘ir ko‘rinishidagi yog‘ingarchilik bo‘lishi mumkin.

Respublika bo‘yicha ba’zi joylarga kechasi va ertalab tuman tushishi mumkin, Farg‘ona vodiysining ayrim joylariga tuman tushishi kunduzi ham saqlanib turadi.

24-dekabrda respublika bo‘yicha ba’zi joylarda shamol tezligi 15-20 metr/sekundgacha kuchayishi mumkin.

Toshkentda 22—24-dekabr kunlari yog‘ingarchilik kutilmaydi. Kechasi va ertalab ba’zi joylarga tuman tushishi mumkin. Shamol sharqdan birozdan o‘rtachagacha esadi. Harorat juma kuni kunduzi 10-12 daraja iliq bo‘ladi, shanba va yakshanba kunlari esa kechalari 3-5 daraja iliqqacha, kunduz kunlari 14-16 daraja iliqqacha asta-sekin ko‘tariladi.