O‘zbekistonda madaniy meros obyektlariga umumiy hisobda 28 milliard so‘mdan ziyod zarar yetkazilgani aniqlandi. Bu haqda Madaniy meros agentligiligi matbuot xizmati xabar berdi.
Ma’lum qilinishicha, 2023-yil davomida madaniy meros obyektlarini asrashga doir ishlar bo‘yicha 53 ta madaniy meros obyektida restavratsiya, ta’mirlash-tiklash ishlarini bajarish va qolgan obyektlarning loyiha hujjatlarini ishlab chiqish uchun 49,1 milliard so‘mlik shartnomalar rasmiylashtirilgan va ta’mirlash-tiklash ishlari olib borilmoqda.
Shuningdek, 5 ta davlat muzeyi binolarini mukammal ta’mirlash uchun 2,7 milliard so‘mlik pudrat shartnomalari rasmiylashtirilgan, 6 ta davlat muzeyi binosini mukammal ta’mirlash uchun loyihalashtirish tashkilotlari bilan 414 million so‘mlik loyiha shartnomalari ustida ish olib borilmoqda.
Yil davomida respublika hududida joylashgan Madaniy meros ko‘chmas mulk obyektlarining 5 240 tasiga muhofaza belgilari o‘rnatilgan, 6 780 ta obyektlarga jamoatchi inspektorlar biriktirilgan, 7 832 ta kadastr yig‘ma jildi shakllantirilgan. Madaniy meros obyektlaridan oqilona foydalanish maqsadida 1001 ta tadbirkorlik subyektlari bilan ijara shartnomalari tuzilgan.
Qayd etilishicha, 2023-yil davomida madaniy meros obyektlari hamda uning tutash hududlarida 160 (25 ta jinoiy, 135 ta ma’muriy) noqonuniy holatlar aniqlangan hamda huquqni muhofaza qiluvchi organlarga murojaat qilingan. Amalga oshirilgan davlat nazorati tadbirlarida madaniy meros obyektlariga umumiy hisobda 28 milliard so‘mdan ziyod zarar yetkazilgani aniqlangan. Mamlakat hududidan madaniy boyliklarni noqonuniy yo‘llar bilan olib chiqishga urinish holatlari davomida jami 1,6 milliard so‘mlik 2036 ta ashyo tegishli tartibda to‘xtatib qolingan va 210 ta ekspertiza xulosasi tayyorlangan.
Avvalroq Toshkent viloyatidagi arxeologik yodgorlikka qariyb 14 milliard so‘mlik zarar yetkazilgani to‘g‘risida xabar berilgandi.
Izoh (0)