Ўзбекистонда маданий мерос объектларига умумий ҳисобда 28 миллиард сўмдан зиёд зарар етказилгани аниқланди. Бу ҳақда Маданий мерос агентлигилиги матбуот хизмати хабар берди.
Маълум қилинишича, 2023 йил давомида маданий мерос объектларини асрашга доир ишлар бўйича 53 та маданий мерос объектида реставрация, таъмирлаш-тиклаш ишларини бажариш ва қолган объектларнинг лойиҳа ҳужжатларини ишлаб чиқиш учун 49,1 миллиард сўмлик шартномалар расмийлаштирилган ва таъмирлаш-тиклаш ишлари олиб борилмоқда.
Шунингдек, 5 та давлат музейи биноларини мукаммал таъмирлаш учун 2,7 миллиард сўмлик пудрат шартномалари расмийлаштирилган, 6 та давлат музейи биносини мукаммал таъмирлаш учун лойиҳалаштириш ташкилотлари билан 414 миллион сўмлик лойиҳа шартномалари устида иш олиб борилмоқда.
Йил давомида республика ҳудудида жойлашган Маданий мерос кўчмас мулк объектларининг 5 240 тасига муҳофаза белгилари ўрнатилган, 6 780 та объектларга жамоатчи инспекторлар бириктирилган, 7 832 та кадастр йиғма жилди шакллантирилган. Маданий мерос объектларидан оқилона фойдаланиш мақсадида 1001 та тадбиркорлик субъектлари билан ижара шартномалари тузилган.
Қайд этилишича, 2023 йил давомида маданий мерос объектлари ҳамда унинг туташ ҳудудларида 160 (25 та жиноий, 135 та маъмурий) ноқонуний ҳолатлар аниқланган ҳамда ҳуқуқни муҳофаза қилувчи органларга мурожаат қилинган. Амалга оширилган давлат назорати тадбирларида маданий мерос объектларига умумий ҳисобда 28 миллиард сўмдан зиёд зарар етказилгани аниқланган. Мамлакат ҳудудидан маданий бойликларни ноқонуний йўллар билан олиб чиқишга уриниш ҳолатлари давомида жами 1,6 миллиард сўмлик 2036 та ашё тегишли тартибда тўхтатиб қолинган ва 210 та экспертиза хулосаси тайёрланган.
Аввалроқ Тошкент вилоятидаги археологик ёдгорликка қарийб 14 миллиард сўмлик зарар етказилгани тўғрисида хабар берилганди.
Изоҳ (0)