Namanganda isteʼmolchilar uchun ichimlik suvi narxlari oshirilishi kutilmoqda

Namanganda isteʼmolchilar uchun ichimlik suvi narxlari oshirilishi kutilmoqda. Bu haqda “Namangan suv taʼminot” jamiyati tomonidan o‘tkazilgan matbuot anjumanida maʼlum qilindi, deya xabar beradi “Daryo” muxbiri.

Mutasaddilarga ko‘ra, aholi uchun ichimlik suvining bir kubometri 4 000 so‘m, korxona va tashkilotlar uchun esa 7 000 so‘m etib belgilanishi ko‘zda tutilgan.

Ushbu o‘zgarishlar yoqilg‘i-energetika resurslari, jumladan, elektr energiyasi tariflari oshishi hamda viloyatda ichimlik suvi yetkazib berishning relyef bilan bog‘liq murakkab va ko‘p xarajat talab etuvchi jihatlari bilan izohlanmoqda.

Qayd etilishicha, viloyatda ichimlik suvi isteʼmolchilarga nasos agregatlari orqali, 4-5 marotabagacha ko‘tarib uzatilishi katta miqdorda elektr energiyasi sarfiga sabab bo‘lmoqda. Umumiy xarajatlarda esa energiyaning ulushi tannarxning uchdan bir qismiga to‘g‘ri keladi.

Anjuman davomida taʼkidlanishicha, narx oshirilishi bilan bog‘liq hisob-kitoblar mutasaddi tashkilotlar va xalq deputatlari viloyat kengashiga yuborilgan. Kengashning tegishli qaroridan keyin yangi tariflar kuchga kirishi mumkin.

Maʼlumot uchun, hozirda Namangan viloyatida ichimlik suvi uchun aholi 2550 so‘m, korxona-tashkilotlar esa 3315 so‘m to‘lab kelmoqda. Bu narxlar 2020-yil dekabrida belgilangan va shundan beri o‘zgarmay kelayotgan edi.