Наманганда истеъмолчилар учун ичимлик суви нархлари оширилиши кутилмоқда. Бу ҳақда “Наманган сув таъминот” жамияти томонидан ўтказилган матбуот анжуманида маълум қилинди, дея хабар беради “Дарё” мухбири.
![](https://daryo.uz/static/2023/%D0%90%D0%B7%D0%B8%D0%B7%D0%B1%D0%B5%D0%BA/photo_2023-12-16_22-15-52.jpg?_t=1703247495)
Фото: Тоирбек Комилжонов
Мутасаддиларга кўра, аҳоли учун ичимлик сувининг бир кубометри 4 000 сўм, корхона ва ташкилотлар учун эса 7 000 сўм этиб белгиланиши кўзда тутилган.
Ушбу ўзгаришлар ёқилғи-энергетика ресурслари, жумладан, электр энергияси тарифлари ошиши ҳамда вилоятда ичимлик суви етказиб беришнинг релеф билан боғлиқ мураккаб ва кўп харажат талаб этувчи жиҳатлари билан изоҳланмоқда.
![](https://daryo.uz/static/2023/%D0%90%D0%B7%D0%B8%D0%B7%D0%B1%D0%B5%D0%BA/photo_2023-12-16_22-15-55.jpg?_t=1703247297)
Фото: Тоирбек Комилжонов
Қайд этилишича, вилоятда ичимлик суви истеъмолчиларга насос агрегатлари орқали, 4-5 маротабагача кўтариб узатилиши катта миқдорда электр энергияси сарфига сабаб бўлмоқда. Умумий харажатларда эса энергиянинг улуши таннархнинг учдан бир қисмига тўғри келади.
Анжуман давомида таъкидланишича, нарх оширилиши билан боғлиқ ҳисоб-китоблар мутасадди ташкилотлар ва халқ депутатлари вилоят кенгашига юборилган. Кенгашнинг тегишли қароридан кейин янги тарифлар кучга кириши мумкин.
![](https://daryo.uz/static/2023/%D0%90%D0%B7%D0%B8%D0%B7%D0%B1%D0%B5%D0%BA/photo_2023-12-16_22-15-57.jpg?_t=1703247297)
Фото: Тоирбек Комилжонов
Маълумот учун, ҳозирда Наманган вилоятида ичимлик суви учун аҳоли 2550 сўм, корхона-ташкилотлар эса 3315 сўм тўлаб келмоқда. Бу нархлар 2020 йил декабрида белгиланган ва шундан бери ўзгармай келаётган эди.