O‘zbekistonda IT sohasida 300 ming nafar yoshlarni xalqaro kompaniyalar talabiga mos dasturlar asosida tayyorlash va ish bilan ta’minlash rejalashtirilgan. Bu haqda prezidentning 20-dekabr kuni Raqamli texnologiyalar vazirligiga tashrifi davomidagi taqdimotda ma’lum qilindi.
Davlat rahbari matbuot xizmatining xabar qilishicha, kelgusi yildan boshlab, har yili 5 ming nafar iqtidorli yoshlarni saralash, o‘qitish hamda xalqaro mehnat bozoriga tayyorlash tizimi joriy etiladi. Xorazm viloyatida “Al-Xorazmiy vorislari” loyihasida o‘qitish boshlanadi.
Taqdimotda prezidentga Samarqand viloyati Nurobod tumanida tashkil etilgan IT Village haqida so‘zlab berildi. Bu majmua 1—9-sinf o‘quvchilarini axborot texnologiyalari bilan tanishtirish va bunga qiziqtirish, ularga ilk ko‘nikmalarni o‘rgatishga qaratilgan. Davlat rahbari bunday majmualarni barcha hududlarda barpo etish bo‘yicha topshiriq berdi.
Shavkat Mirziyoyev shu kuni IT infratuzilmasini yaxshilash, soha va tarmoqlarni raqamlashtirish bo‘yicha o‘tkazgan videoselektor yig‘ilishida ham chet tili va ITni biladigan kadrlar zarurligini aytib o‘tdi.
Davlat rahbari Samarqand viloyati Nurobod tumanidagi IT shaharcha loyihasini ma’qullab, shu tajriba asosida 2024-yil yakuniga qadar har bir tumanda shunday shaharcha yaratish muhimligini ta’kidladi.
Raqamli texnologiyalar vazirligi oldiga kelgusi yilda 8 ming nafar eng iqtidorli yoshlarni saralab, nufuzli xalqaro kompaniyalar talabiga mos dastur asosida o‘qitish, ularni IT kompaniyalaridagi yuqori daromadli ishlarga joylashtirish vazifasi qo‘yildi.
Shuningdek, kelgusi yildan “Har bir mahallada kamida ikki nafar dasturchi” loyihasi boshlanadi. 30 ming yoshlarni ingliz tiliga o‘qitib, IELTS’dan kamida 7 ball, nemis va boshqa tillardan B2 sertifikati olishi uchun sharoit yaratiladi.
Shuningdek, amerikalik hamkorlar bilan “Inklyuziv raqamlashtirish” loyihasi doirasida kamida 20 ming nafar yoshlar, ayollar va nogironligi bo‘lgan aholi bandligini ta’minlash rejalashtirilgan.
Izoh (0)