Raqamlashtirishdan bosh tortayotgan rahbar — korrupsiyani yo‘q qilishga intilmagan rahbar. Bu haqda Shavkat Mirziyoyev IT infratuzilmasini yaxshilash, soha va tarmoqlarni raqamlashtirish yuzasidan videoselektor yig‘ilishida aytib o‘tdi.
Prezident matbuot kotibining ma’lum qilishicha, yig‘ilishda davlat rahbari jahon iqtisodiyoti shiddat bilan o‘zgarib borayotgan sharoitda hech bir sohani raqamli texnologiyalarsiz tasavvur qilib bo‘lmasligini ta’kidladi.
“Raqamlashtirishdan bosh tortayotgan rahbar — korrupsiyani yo‘q qilishga intilmagan rahbar”, — dedi u.
Prezident raqamlashtirish, eng avvalo, mahalladan boshlanishi kerakligini ta’kidladi.
Qayd etilishicha, hozir “mahalla beshligi” planshet va kompyuter bilan to‘liq ta’minlangan. Lekin mahalla raisi, hokim yordamchisi, yoshlar yetakchisi va xotin-qizlar faoli raqamli texnologiyalardan qanchalik foydalanayotgani savol ostida. Masalan, yoshlar yetakchisiga subsidiya olish uchun murojaat qilgan fuqaro haligacha mahalla raisi, hokim yordamchisi yoki bandlik bo‘limidan ishsizlik to‘g‘risida ma’lumotnoma olib kelishga majbur.
“Qachon mahallaga raqamlashtirish to‘liq kirib borsa, shundagina ‘Elektron hukumat’ ishlab ketdi, deb ayta olamiz”, — dedi prezident.
Mutasaddilarga 1-martga qadar “Raqamli mahalla” yagona platformasini ishga tushirish va “mahalla yettiligi”ni raqamli tizimlardan foydalanishga o‘qitish topshirildi.
Qayd etilishicha, 2023-yilning o‘zida O‘zbekistonda:
- ta’lim, bank, moliya, bojxona, qishloq xo‘jaligi, geologiya, kadastr kabi sohalarni raqamli transformatsiya qilish doirasida 100 ta dasturiy loyiha ishlab chiqildi;
- 500 dan ziyod yangi IT kompaniyalari tashkil etilib, sohaga 475 million dollar to‘g‘ridan-to‘g‘ri xorijiy investisiya kirib keldi;
- yil yakuni bilan IT xizmatlari hajmi 10 trillion so‘mga yetishi (2022 yilga nisbatan – 1,5 barobar ko‘p), eksporti esa 300 million dollardan oshishi (2 barobar) kutilmoqda.
Prezident sohani yanada rivojlantirib, xalqaro darajaga olib chiqish bo‘yicha qilinadigan ishlar hali juda ko‘p ekanligini aytdi.
Izoh (0)