Ўзбекистонда IT соҳасида 300 минг нафар ёшларни халқаро компаниялар талабига мос дастурлар асосида тайёрлаш ва иш билан таъминлаш режалаштирилган. Бу ҳақда президентнинг 20 декабрь куни Рақамли технологиялар вазирлигига ташрифи давомидаги тақдимотда маълум қилинди.
Давлат раҳбари матбуот хизматининг хабар қилишича, келгуси йилдан бошлаб, ҳар йили 5 минг нафар иқтидорли ёшларни саралаш, ўқитиш ҳамда халқаро меҳнат бозорига тайёрлаш тизими жорий этилади. Хоразм вилоятида “Ал-Хоразмий ворислари” лойиҳасида ўқитиш бошланади.
Тақдимотда президентга Самарқанд вилояти Нуробод туманида ташкил этилган IT Village ҳақида сўзлаб берилди. Бу мажмуа 1—9-синф ўқувчиларини ахборот технологиялари билан таништириш ва бунга қизиқтириш, уларга илк кўникмаларни ўргатишга қаратилган. Давлат раҳбари бундай мажмуаларни барча ҳудудларда барпо этиш бўйича топшириқ берди.
Шавкат Мирзиёев шу куни IT инфратузилмасини яхшилаш, соҳа ва тармоқларни рақамлаштириш бўйича ўтказган видеоселектор йиғилишида ҳам чет тили ва ITни биладиган кадрлар зарурлигини айтиб ўтди.
Давлат раҳбари Самарқанд вилояти Нуробод туманидаги IT шаҳарча лойиҳасини маъқуллаб, шу тажриба асосида 2024 йил якунига қадар ҳар бир туманда шундай шаҳарча яратиш муҳимлигини таъкидлади.
Рақамли технологиялар вазирлиги олдига келгуси йилда 8 минг нафар энг иқтидорли ёшларни саралаб, нуфузли халқаро компаниялар талабига мос дастур асосида ўқитиш, уларни IT компанияларидаги юқори даромадли ишларга жойлаштириш вазифаси қўйилди.
Шунингдек, келгуси йилдан “Ҳар бир маҳаллада камида икки нафар дастурчи” лойиҳаси бошланади. 30 минг ёшларни инглиз тилига ўқитиб, IELTS’дан камида 7 балл, немис ва бошқа тиллардан B2 сертификати олиши учун шароит яратилади.
Шунингдек, америкалик ҳамкорлар билан “Инклюзив рақамлаштириш” лойиҳаси доирасида камида 20 минг нафар ёшлар, аёллар ва ногиронлиги бўлган аҳоли бандлигини таъминлаш режалаштирилган.
Изоҳ (0)