Adliya vazirligining sobiq xodimi Facebook’dagi sahifa ortidan 1 yil 9 oyga ozodlikdan cheklandi. Bu haqda Inson huquqlari ezgulik jamiyati raisi Abdurahmon Tashanov xabar berdi.
Unga ko‘ra, Adliya vazirligining jamoatchilik bilan aloqalar bo‘limi sobiq xodimi Husan Ravshanov Facebook’dagi sahifa ortiga yashirinib, Adliya vazirligi mutasaddilarini pora olganlikda ayblab, tuhmat qilgan va mulozimlarni obro‘sizlantirgan.
19-dekabrda jinoyat ishlari bo‘yicha Toshkent shahar sudining apellyatsiya sudlov hay’ati ana shu ishni ko‘rib chiqdi. Jinoyat kodeksining 139-moddasi (tuhmat) bilan ayblangan Ravshanovni jinoyatchi deb topdi va unga nisbatan quyi instansiya sudining 1 yil 9 oyga ozodlikni cheklash jazosini kuchda qoldirdi.
“Sudlov tizimiga sharmandalik bilan kiradigan ishlarning biri bo‘lgan jarayonda himoyachi sifatida qatnashdim. Nega sharmandalik? Nega tizimning obro‘sini yerga uradigan gaplarni iddao qilmoqdaman? Ravshanovning taqdiri mening ham boshimga tushmaydimi? Eshiting!
Birinchidan, sud lingvistik ekspertiza, leksikologik ekspertiza, va hokazo, ekspertizalarning birortasi “Sanjar Karimov” profilidagi yozuvlarning aynan Ravshanovniki ekaniga oid qat’iy xulosa bermagan.
Ikkinchidan, “Sanjar Karimov” profili haqiqatan ham Husan Ravshanovga tegishlimi? Unda nega profil Ravshanov qamoqda o‘tirgan paytda ham ishlab turdi? Hozir ham ishlab turibdi. (Do‘stligingizda bo‘lsa tekshirib ko‘ring). Agar bir paytning o‘zida profilning Ravshanovdan boshqa ham foydalanuvchisi bo‘lsa, tergov nega buni aniqlamadi?
Uchinchidan, IIVning tergov izolyatori karvonsaroymi? Unga jinoyat ishining protsessual ishtirokchisi bo‘lmagan Adliya vazirligining korrupsiyaga qarshi kurash bo‘limi boshlig‘i J.Uzoqov, kadrlar boshqarmasi boshlig‘i Sh.Qo‘chqorov nega kirib yuribdi? Ayblanayotgan shaxsdan tushuntirish va arizalar olmoqda? Mamlakatda qonunchilikka mas’ul bo‘lgan Adliya vazirligi bu holni qanday izohlaydi?
Tushundimki, sud tergov organining ayblovini shunchaki qonunlashtirib beruvchi organ ekan. Odil sudlov haqidagi hom xayollarga, cho‘pchaklarga endi ishonmayman. Chunki yuqoridagi savollarning barchasini sudda guvoh sifatida so‘ralgan adliya xodimlari, ekspertlar, guvohlarga berdik. Jarayonda ishning soxta ekanini sud hay’atining ong-shuuriga yetib boradigan darajada isbotladik.
Biroq sud hukmni kuchda qoldirdi, tergov organi, adliya xodimlarining xatti-harakatlariga huquqiy baho bermadi. Yuqori instansiya sudidan ham umid qilayotganimiz yo‘q, albatta yuqori bundan yaxshi bo‘lganida quyi tizim bunday bo‘lmasdi”, — deb yozib qoldirgan Inson huquqlari ezgulik jamiyati raisi.
Avvalroq Adliya vazirligi jamoatchilik bilan aloqalar bo‘limi xodimi qamoqqa olingani haqida xabar berilgan edi. Keyinchalik advokat Abdumalik Abdullayev xodim ozod etilganini maʼlum qilgan.
Adliya vazirligining jamoatchilik bilan aloqalar bo‘limi sobiq bosh maslahatchisi Husan Ravshanov 2023-yil 3-fevral kuni JPKning 227-moddasi tartibida ushlanib, unga nisbatan 5-fevral kuni qamoqqa olish ehtiyot chorasi qo‘llanilgan edi.
Izoh (0)