Buxoro tumanining sobiq hokimi Xayrullo Jo‘rayev qamoqqa olindi, deb xabar beradi Buxoro viloyat sudlari matbuot xizmati.
Ma’lum qilinishicha, Jinoyat ishlari bo‘yicha Buxoro shahar sudida Buxoro viloyati prokurorining birinchi o‘rinbosarining Jinoyat kodeksining 205-moddasi (Hokimiyat yoki mansab vakolatini suiisteʼmol qilish) 2-qismi “a” bandi, 206-moddasi (Hokimiyat yoki mansab vakolati doirasidan chetga chiqish) 2-qismi “a” bandi, 207-moddasi (Mansabga sovuqqonlik bilan qarash) 1-qismi, 209-moddasi (Mansab soxtakorligi) 2-qismi “a” bandi va 229-4-moddasi (Yer berish tartibini buzish) 2-qismi “a” bandida nazarda tutilgan jinoyatlarni sodir etganlikda gumon qilinuvchi va Jinoyat-protsessual kodeksining 221-moddasi (Ushlab turish asoslari) tartibida ushlangan Xayrullo Jo‘rayevga (Buxoro tumani hokimi lavozimida ishlagan) nisbatan “qamoqqa olish” tarzidagi ehtiyot chorasini qo‘llash to‘g‘risidagi iltimosnomasi taqdim etilgan hujjatlar bilan ko‘rib chiqilgan.
Jinoyat ishlari bo‘yicha Buxoro shahar sudining 16-dekabrdagi ajrimi bilan Buxoro viloyati prokurorining birinchi o‘rinbosarining iltimosnomasi qanoatlantirilib, gumon qilinuvchi Xayrullo Jo‘rayevga nisbatan qamoqqa olish tarzidagi ehtiyot chorasi qo‘llanilib, qamoqqa olinishi va tergov hibsxonasiga joylashtirilishi belgilangan.
Xayrullo Jo‘rayev 2020-yilning dekabrida Buxoro tumani hokimi etib tasdiqlangan. 2023-yilning avgust oyida uning o‘rniga Halimjon Safarov tuman hokimi vazifasini bajaruvchi etib tayinlangandi.
Izoh (0)