Toshkent viloyatining Bekobod tumani hokimi Shuhrat Mirzayev 2023-yilning 15-dekabr kuni kechki payt xizmat uyidan olib ketilgan. Bu haqda “Daryo” jurnalisti bilan suhbatlashgan manba gapirib berdi.
Hokimning qo‘lga olinganini jamoatchilikka oshkor qilgan “Bugun.uz” Shuhrat Mirzayevning korrupsiyaga qarshi kurashish tadbiri doirasida budjet pullarini o‘zlashtirganlikda ayblanib, ushlanganini yozgandi.
“Daryo” ayni paytda hokimlik vazifasini bajarayotgan Shuhrat Mirzayevning qo‘lga olingani yuzasidan qo‘shimcha axborot olish maqsadida Toshkent viloyati hokimligi axborot xizmati mas’ullari bilan bog‘landi.
“Bekobod bilan bog‘liq emas”, — dedi bu haqdagi savolga javob qaytargan viloyat hokimligi axborot xizmati rahbari Behzod Qobulov.
Shuhrat Mirzayev shu yilning 7-avgust kuni Xalq deputatlari Bekobod tumani kengashining qarori bilan tuman hokimi etib tayinlangandi. U 1982-yil Toshkent shahrida tug‘ilgan bo‘lib, 2004-yil Toshkent moliya institutini, 2007-yil G.V.Plexanov nomidagi Rossiya iqtisodiyot akademiyasining Toshkent shahridagi filialini tugatgan. 2009-yil O‘zbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.
Lavozimga tayinlangunga qadar u “Qishloq qurilish bank” aksiyadorlik tijorat bankining Buxgalteriya hisobi va hisoboti departamenti boshlig‘ining o‘rinbosari vazifasida ishlab kelgan.
“Daryo” manbasining qo‘shimcha qilishicha, Mirzayevning qo‘lga olinishi aynan bankdagi faoliyatiga borib taqaladi.
Izoh (0)