Namangan viloyati hokimining o‘rinbosari Saidahmad Sultonov qamoqqa olindi va tergov hibsxonasiga joylashtirildi. Bu haqda viloyat sudlari axborot xizmati xabar berdi.
Qayd etilishicha, Jinoyat ishlari bo‘yicha Namangan shahar sudida Namangan viloyati prokurori o‘rinbosarining Jinoyat kodeksining 205-moddasi (hokimiyat yoki mansab vakolatini suiiste’mol qilish) 2-qismi “a” bandi va 206-moddasi (hokimiyat yoki mansab vakolati doirasidan chetga chiqish) 2-qismi “a” bandida nazarda tutilgan jinoyatlarni sodir etganlikda gumon qilinuvchi va Jinoyat-protsessual kodeksining 221-moddasi (ushlab turish asoslari) tartibida ushlangan S.S. (erkak, 1976-yilda Namangan shahrida tug‘ilgan, Namangan viloyati hokimining qurilish masalalari bo‘yicha o‘rinbosari lavozimida ishlagan)ga nisbatan qamoqqa olish tarzidagi ehtiyot chorasini qo‘llash to‘g‘risidagi iltimosnomasi taqdim etilgan hujjatlar bilan ko‘rib chiqildi.
Jinoyat ishlari bo‘yicha Namangan shahar sudining 2023-yil 16-dekabrdagi ajrimi bilan Namangan viloyati prokurori o‘rinbosarining iltimosnomasi qanoatlantirilib, gumon qilinuvchi S.S.ga nisbatan qamoqqa olish tarzidagi ehtiyot chorasi qo‘llanib, qamoqqa olinishi va tergov hibsxonasiga joylashtirilishi belgilandi.
Izoh (0)