Бухоро туманининг собиқ ҳокими Хайрулло Жўраев қамоққа олинди, деб хабар беради Бухоро вилоят судлари матбуот хизмати.
Маълум қилинишича, Жиноят ишлари бўйича Бухоро шаҳар судида Бухоро вилояти прокурорининг биринчи ўринбосарининг Жиноят кодексининг 205-моддаси (Ҳокимият ёки мансаб ваколатини суиистеъмол қилиш) 2-қисми “а” банди, 206-моддаси (Ҳокимият ёки мансаб ваколати доирасидан четга чиқиш) 2-қисми “а” банди, 207-моддаси (Мансабга совуққонлик билан қараш) 1-қисми, 209-моддаси (Мансаб сохтакорлиги) 2-қисми “а” банди ва 229-4-моддаси (Ер бериш тартибини бузиш) 2-қисми “а” бандида назарда тутилган жиноятларни содир этганликда гумон қилинувчи ва Жиноят-процессуал кодексининг 221-моддаси (Ушлаб туриш асослари) тартибида ушланган Хайрулло Жўраевга (Бухоро тумани ҳокими лавозимида ишлаган) нисбатан “қамоққа олиш” тарзидаги эҳтиёт чорасини қўллаш тўғрисидаги илтимосномаси тақдим этилган ҳужжатлар билан кўриб чиқилган.
Жиноят ишлари бўйича Бухоро шаҳар судининг 16 декабрдаги ажрими билан Бухоро вилояти прокурорининг биринчи ўринбосарининг илтимосномаси қаноатлантирилиб, гумон қилинувчи Хайрулло Жўраевга нисбатан қамоққа олиш тарзидаги эҳтиёт чораси қўлланилиб, қамоққа олиниши ва тергов ҳибсхонасига жойлаштирилиши белгиланган.
Хайрулло Жўраев 2020 йилнинг декабрида Бухоро тумани ҳокими этиб тасдиқланган. 2023 йилнинг август ойида унинг ўрнига Ҳалимжон Сафаров туман ҳокими вазифасини бажарувчи этиб тайинланганди.
Изоҳ (0)