“Homiladorlar ham zinadan chiqib-tushishga majbur”. Termizliklar foydalanishga topshirilgan 7 qavatli “dom”da lift yo‘qligidan shikoyat qilmoqda

Surxondaryo viloyatining Termiz shahrida yashovchi aholi vakillari “Daryo”ga murojaat qilib, 2021-yil foydalanishga topshirilgan uy yashash uchun talabga javob bermasligi, kamchiliklari bartaraf etilmaganidan shikoyat qildi. 

Bizning “dom”imizda topshirilganidan beri lifti yo‘q. Ikki yil oldin aholi yashay boshlagan “dom”da “svet”ga hisoblagich qo‘yilmagan. Romlari talabga javob bermaydi. Bu muammolar haqida quruvchilarga aytishdan charchadik. Kimga murojaat qilishni bilmay, videomurojaat qila boshladik, — deydi ko‘p qavatli uyda yashovchi Sabohat Abdimurodova. 

Murojaatchilarning bildirishicha, odamlar e’tiroziga sabab bo‘layotgan uy Guber Global Consructions MCHJ tomonidan barpo etilgan bo‘lib, tashkilot mas’uli Komil Saydaliyev hisoblanadi. 

Bu uyni Komil aka degan kishi qurgan. Lekin u odam bilan ko‘rishmaganmiz. Telefonda gaplashganmiz. Deyarli telefoniga javob bermaydigan kishi. Ukasi Faxriddin bilan ko‘rishganmiz. Ko‘p ishni shu Faxriddin aka hal qiladi. Komil aka esa Toshkentda yashaydi, — deydi muammolarini hech kim eshitmayotganini aytayotgan aholi vakillari. 

Shikoyatchilar Termiz shahrining ob-havosi changli ekanini, har ikki kunda bo‘ladigan changli havo sabab xonadonlari changga to‘lishini aytmoqda. 

Termizdagi changli havoda uyimiz qumga to‘ladi. Sababi quruvchi qo‘yib bergan deraza romlari sifatsiz, talabga javob bermaydi. Yoki bo‘lmasa qurilish paytida deraza o‘lchamlari to‘g‘ri olinmagan va shunga yarasha romlar o‘rnatilmagan, — deydi aholi vakillari.

Shu uyda yashovchi yana bir fuqaro Muborak Bovulovaning bildirishicha, 2021-yil aholiga topshirilgan uyning kamchiliklari ko‘p bo‘lgan. 

Bizga “dom”ni topshirishda uyning kadastr hujjati qilinishi kerak edi, elektr toki va gazning hisoblagichi o‘rnatilishi lozim edi. Ichimlik suvi va kanalizatsiya tarmog‘i tayyor bo‘lishi, bolalar o‘yingohi qurib bitkazilishi kerak bo‘lgan. Ammo bularning hammasi qilinmay qoldi. Faqat kanalizatsiya tarmog‘i bor, xolos, — deydi Muborak opa. 

Muborak opaning aytishicha, aholi vakillari bu masala yuzasidan viloyat hokimligiga ham shikoyat qilgan.

Viloyat hokimiga ham shikoyat qilib bordik. Biz hokim qabuliga borganimizda viloyat hokimi chet el safariga ketgan ekan. Ishimiz bitmadi. Elektr tarmoqdagilar esa har kuni kelib, bizning “svet”mizni o‘chirib ketishadi. Sababini so‘rasak, sizlarda elektr toki hisoblagichi o‘rnatilmagan deyishadi, — deydi murojaatchi Marhabo Nazarova. 

Aholining qo‘shimcha qilishicha, ko‘p qavatli uyda elektr toki takroran uzilavergach, odamlar viloyat prokuraturasi va shahar prokuraturasiga shikoyat qilgan. 

Shu uyda yashovchi Gavhar Karimovaning aytishicha, ko‘p qavatli uyda lift bo‘lmagani homilador ayollar, keksa yoshdagi kishilarning uyiga kirib-chiqishiga qiyinchilik tug‘dirmoqda. 

Murojaatchilardan yana biri Latofat Jalilovaning bildirishicha, quruvchiga liftni qo‘yib berish haqidagi barcha so‘rovlar natijasiz qolgan, quruvchi har safar liftni o‘rnatib beramiz, deyishdan nariga o‘tmagan. 

Homilador ayollar to‘qqiz oy shu liftsiz uyga zinadan kirib-chiqib, farzandli ham bo‘ldi. Lekin hamon liftdan darak yo‘q. Har safar mehmon kelsa, yoki keksa yoshdagi yaqinlarimiz kelsa, uyga kirib-chiqishda qiyinchilikka uchraydi. Bizning asosiy muammomiz bo‘lgan liftni qo‘yib berishlarini talab qilamiz. Shuningdek, domofon ham o‘rnatilmagan. Eshiklar ochiq qolib ketadi. Bo‘yi yetgan qizlarimiz bor, uyga har kim kirib-chiqishidan qo‘rqamiz, — deydi Latofat Jalilova. 

Guber Global Consructions MCHJda ish boshqaruvchi sifatida ishlab kelayotgan Faxriddin Saydaliyev “Daryo” jurnalistining bu haqdagi savollariga javob berar ekan, 2021-yilda foydalanishga topshirilgan yangi ko‘p qavatli uyda ayni kungacha 9 ta kamchilik bo‘lganini tan oldi.

Shu kungacha mablag‘ bilan bog‘liq muammolar sabab ko‘p qavatli uyimizda 9 ta kamchilik bor edi. Bular bolalar o‘yingohi qurilmagani, lift va domofon o‘rnatilmagani, sovg‘a sifatida berilayotgan konditsionerlarni o‘rnatish to‘liq yakunlanmagani, shuningdek, elektr toki va gazga hisoblagich o‘rnatilmagani edi. Lekin kuni kecha rahbarimiz Komil aka aholi bilan uchrashib, muloqot qildi. Muammolar tez kunda yakun topishini ma’lum qildi, — deydi qurilish tashkiloti mas’uli. 

Faxriddin Saydaliyevga ko‘ra, 7 qavatli 54 ta xonadondan iborat uy yaqiniga chiqindixona qurilgan. Odamlarga va’da qilingan konditsionerlar o‘rnatib berilgan. 

Har bir uy olgan odamga konditsioner sovg‘a qilishni va’da qilgandik. Va’daga ko‘ra, 54 ta xonadonning 46 tasiga konditsioner o‘rnatdik. 8 ta xonadonga konditsioner o‘rnatish ishlari qoldi. Shuningdek, suv chiqardik. Bolalar o‘yingohini qurdik. Gaz hisoblagichi barcha xonadonlarga o‘rnatildi. Elektr toki bo‘yicha esa 44 ta xonadonga hisoblagich o‘rnatilgan. Qolgan xonadonlarga ham asta-sekin o‘rnatyapmiz, — deydi mas’ul. 

“Daryo” mazkur holat yuzasidan viloyat prokuraturasi mas’ullari bilan bog‘lanib, aholi shikoyatiga sabab bo‘lgan holat yuzasidan ma’lumot so‘radi. Prokuratura axborot xizmati rahbari Jumanazar Xursanov holat bo‘yicha tahririyatga qo‘shimcha axborot berilishini bildirdi.