Surxondaryo, Samarqand va Toshkent viloyatlarida isteʼmolga yaroqsiz alkogol mahsulotlarining sotuvga chiqarilishiga chek qo‘yildi, deb xabar beradi Bosh prokuratura huzuridagi departament.
Ma’lum qilinishicha, departamentning Oqdaryo tuman bo‘limi tomonidan tuman DXX va IIB xodimlari hamkorligida olingan maʼlumotlarga asosan tezkor tadbir o‘tkazilgan. Tadbirda “Loyish” MFY hududidagi xonadonda yashovchi E.X. o‘z uyida qo‘lbola usulda alkogol mahsulotlari ishlab chiqarib sotayotgani aniqlangan. Fuqaroning xonadonidan 5 xil turdagi 2 086 dona aroq, 786 dona “Stariy Samarkand” nomli konyak, 330 litr spirt, alkogolni filtrlovchi maxsus ko‘mir va boshqa ishlab chiqarishda foydalanilgan uskunalar ashyoviy dalil sifatida olingan.
Departamentning Yangiyo‘l tuman bo‘limi tomonidan IIB JQB xodimlari bilan hamkorlikda o‘tkazilgan tezkor tadbirda fuqaro A.T. o‘z uyida qalbaki aksiz markalardan foydalanib, alkogol mahsulotlarini sotish maqsadida ishlab chiqarayotgani aniqlangan. Uning uyidan 6 xil turdagi 130 dona qo‘lbola usulda tayyorlangan aroq, jami 55 litr yarim tayyor aroq va konyak hamda 1 150 dona qalbaki aksiz markalar va boshqa ishlab chiqarishda foydalanilgan uskunalar ashyoviy dalil sifatida olingan.
Shu kabi, departamentning Qiziriq tuman bo‘limi tomonidan o‘tkazilgan tezkor tadbirda esa Sariosiyo tumanida faoliyat yurituvchi “F.R.” xususiy korxonasiga qarashli do‘kon sotuvchisi T.B. xaridorga “Lider” nomli alkogol mahsulotini sotgan vaqtida ushlanib, ushbu savdo do‘koni va omborxonasidan qalbaki aksiz markali 8 xil turdagi 319 dona isteʼmolga yaroqsiz alkogol mahsulotlari ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi. Shuningdek, Samarqandda salkam 5 mlrd so‘mlik isteʼmolga yaroqsiz alkogol mahsulotlari savdosiga chek qo‘yilgan edi.
Izoh (0)