Samarqand, Qashqadaryo viloyatlari hamda Qoraqalpog‘iston Respublikasida qalbaki aksiz markali alkogol va tamaki mahsulotlarining muomalaga kiritilishiga chek qo‘yildi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Samarqand shahar, Do‘stlik, Karmana, Sergeli va Parkent tumani bo‘limlari tomonidan bojxona boshqarmasi, IIB va soliq inspksiyasi xodimlari bilan hamkorlikda tezkor tadbirlar o‘tkazilgan. Tadbirlar davomida 5 ta MCHJga qarashli savdo do‘konlarida hech qanday hujjatsiz qalbaki aksiz markali alkogol va aksiz markasiz taʼmaki mahsulotlari sotuvga qo‘yilgani aniqlanib, ushbu savdo do‘konlaridan 72 xil turdagi jami 19 722 dona qalbaki aksiz markali alkogol hamda 1 430 quti tamaki mahsulotlari ashyoviy dalil sifatida olingan.
Shu kabi, departamentning Qashqadaryo viloyat boshqarmasi tomonidan o‘tkazilgan tezkor tadbirda “SH.O.” MCHJga qarashli savdo do‘koni sotuvchisi xaridorga “Shahrisabz” va “Zelyoniy gorod” nomli qalbaki aksiz markali alkogol mahsulotini sotgan vaqtida ushlanib, ushbu savdo do‘konidan 12 xil turdagi 2 111 dona qalbaki aksiz markali alkogol mahsuloti ashyoviy dalil sifatida olingan.
Shuningdek, To‘rtko‘l tumanidagi “Miskin” YPX maskanida fuqaro J.X. boshqaruvidagi Yutong rusumli avtobusda qalbaki aksiz markali 1 200 dona “Qaratau” nomli alkogol mahsulotini Samarqand viloyatida o‘tkazish maqsadida olib ketayotgani aniqlangan. Fuqaro J.X.ning ko‘rsatuviga asosan davom etgan tadbirda fuqaro S.S.ning xonadonidan qo‘lbola usulda tayyorlangan jami 1 356 dona “Qaratau”, “Aktau” va “Russkaya vodka” nomli alkogol mahsuloti, 12 litr spirt, 450 dona qalbaki aksiz marka va boshqa tovar moddiy boyliklari ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)