Surxondaryo, Namangan va Sirdaryoda qalbaki aksiz markali alkogol mahsulotlarini sotish bilan shug‘ullangan do‘konlar aniqlandi

Surxondaryo va Namangan viloyatlarida qalbaki aksiz markali alkogol mahsulotlarini sotuvga qo‘ygan savdo do‘konlari aniqlandi, deb xabar beradi Bosh prokuratura huzuridagi departament.

Qayd etilishicha, departamentning Surxondaryo viloyat boshqarmasi tomonidan Soliq inspeksiyasi xodimlari bilan hamkorlikda tezkor tadbir o‘tkazilgan. Tadbirda Sho‘rchi tumanidagi “B.f.” xususiy korxonasi rahbari F.M. xaridorga 205 dona “KVADRAT” nomli alkogol mahsulotini 4,1 million so‘mga sotgan vaqtida ushlangan. Shuningdek, ushbu savdo do‘koni va omborxonasidan Toshkent viloyati Chinoz tumanidagi “Komsar” MCHJda ishlab chiqarilganligi ko‘rsatilgan 19 xil turdagi umumiy bahosi 981,8 million so‘mlik jami 29 080 dona qalbaki aksiz markali alkogol mahsuloti ashyoviy dalil sifatida olingan.

Departamentning Namangan viloyat boshqarmasi tomonidan o‘tkazilgan tezkor tadbirda To‘raqo‘rg‘on tumanidagi “X.S.” MCHJga qarashli savdo do‘konida kirim hujjatlari bo‘lmagan “Komsar” MCHJda ishlab chiqarilgani ko‘rsatilgan umumiy bahosi 160 million so‘mlik jami 4 524 dona qalbaki aksiz markali alkogol mahsulotlari sotuvga qo‘yilganligi aniqlanib, ushbu mahsulotlar ashyoviy dalil sifatida olingan.

Shu kabi, departamentning Sirdaryo viloyat boshqarmasi tomonidan o‘tkazilgan tezkor tadbirda Sirdaryo tumanidagi “F.M.” MCHJga qarashli savdo do‘konida “Komsar” MCHJda ishlab chiqarilgani ko‘rsatilgan jami 316 dona alkogol mahsuloti savdoga qo‘yilgani, shuningdek 704 dona qalbaki aksiz markalar mavjudligi aniqlanib, ashyoviy dalil sifatida olingan.

Mazkur holatlar yuzasidan Jinoyat kodeksining 176-moddasi (Qalbaki pul, aksiz markasi yoki qimmatli qog‘ozlar yasash, ularni o‘tkazish), 186-1-modasi (Etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.