Toshkentning Yakkasaroy tumanida yo‘lning belgilanmagan qismidan kesib o‘tayotgan piyoda avtobus urib yuborishi oqibatida vafot etgani to‘g‘risida xabar berilgandi. Yakkasaroy tuman sudida haydovchiga nisbatan sud hukmi o‘qildi.
Sud hujjatlari bilan tanishgan “Gazeta.uz”ning yozishicha, 19-iyul kuni soat 16:30 da Bobur ko‘chasida avtobus haydovchisi A.D. chap tizmaga o‘tayotganda orqani ko‘rsatuvchi chap oynaga qarab, 2−3 soniya to‘g‘ri yo‘lga qaramasdan chalg‘ib qolgan. Shu vaqt yo‘lning qatnov qismida belidan tushib qolgan ratsiyasini olish uchun o‘tayotgan G.K.ni urib yuborgan.
Yo‘l-transport hodisasi oqibatida piyoda olgan tan jarohatlari bilan tibbiy muassasaga olib borilgan. Biroq tibbiyot xodimlarining saʼy-harakatlariga qaramasdan u vafot etgan.
Sudda haydovchi qilmishidan pushaymon ekanini va aybiga to‘liq iqrorligini, shuningdek, piyodaning oila aʼzolariga 8,3 million so‘m moddiy yordam berganini maʼlum qilgan. U suddan yengilroq jazo tayinlashni so‘ragan.
Sudda jabrlanuvchining qonuniy vakili va turmush o‘rtog‘i A.M. unga 70 million so‘m moddiy va maʼnaviy zararlarni undirib berishni va sudlanuvchi A.D.ga nisbatan qonun doirasida jazo tayinlashni so‘rab, ko‘rsatma bergan.
Yakunda sud sudlanuvchi A.D.ni Jinoyat kodeksining 266-moddasi 2-qismida (transport vositalari harakati yoki ulardan foydalanish xavfsizligi qoidalarini buzish oqibatida odam vafot etishi) nazarda tutilgan jinoyatni sodir etganlikda aybli deb topgan.
Unga nisbatan 2 yil muddatga muayyan huquqdan, yaʼni transport vositalarini boshqarish huquqidan mahrum qilgan holda 5 yil muddatga ozodlikdan mahrum qilish jazosi tayinlangan.
Avvalroq Toshkentda Yutong avtobusi 47 yoshli piyodani urib yuborgani, Urgutda piyodaning o‘limiga sababchi bo‘lgan Malibu haydovchisiga sud hukmi o‘qilgani to‘g‘risida xabar berilgandi.
Izoh (0)