Samarqand viloyatida piyodaning o‘limiga sababchi bo‘lgan Malibu haydovchisiga jazo tayinlandi. Bu haqda “Zamon” informatsion dasturida ma’lum qilindi.
Ma’lum qilinishicha, 20-avgust kuni soat 00:36 larda 4P-47 avtomobil yo‘lining Urgut tumani “Bog‘ishamol” mahallasidan o‘tgan 59-kilometrida YTH sodir bo‘lgan. Malibu avtomobili yo‘lni kesib o‘tishga uringan piyodani urib yuborgan.
Haydovchi jabrlanuvchini eng yaqin shifoxonaga olib borgan, biroq ko‘rsatilgan tibbiy yordamga qaramay, u vafot etgan.
Jinoyat ishlari bo‘yicha Urgut tuman sudida mazkur jinoyat ishi ko‘rib chiqildi. Sud davomida halok bo‘lgan yigitning otasi o‘g‘li sport bilan shug‘ullangani, bir necha bor chempionatlarda qatnashib, g‘olib bo‘lib kelganini ta’kidlab, sudlanuvchiga og‘ir jazo berilishini so‘ragan. Uning aytishicha, haydovchi juda katta tezlikda harakatlanib, hatto tormoz ham bosmagan.
Haydovchi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismida nazarda tutilgan jinoyatni sodir etganlikda aybdor deb topilib, sud hukmi bilan 6 yil muddatga ozodlikdan mahrum qilish jazosi tayinlandi.
O‘zbekistonda 2023-yilning yanvar—avgust oylari davomida 1415 nafar fuqaro yo‘l-transport hodisasi oqibatida vafot etdi. O‘tgan sakkiz oyda mamlakatda 9 milliondan ortiq yo‘l harakati qoidabuzarligi qayd etilgan. Bularning 8 millionga yaqini qo‘pol qoidabuzarliklar, 26 mingga yaqini transport vositasini mast holda boshqarish, 161 mingdan ortiq piyodalar qoidabuzarligi bilan bog‘liq.
Izoh (0)