Qirg‘iziston prezidenti Sadir Japarov yaqin orada o‘z mulklari ro‘yxatini e’lon qiladi. Bu haqda prezidentning o‘zi “Kabar” agentligiga bergan intervyusida ma’lum qilgan.
Davlat rahbari tadbirkorlar, sobiq amaldorlar va boshqalar o‘z mol-mulkini qonuniylashtirishi uchun avvalroq kapital amnistiyasi to‘g‘risidagi qonun qabul qilinganini eslatdi.
Prezidentning so‘zlariga ko‘ra, hukumat hech narsani yashirmaslikni so‘ramoqda.
“Biz hamma narsani unutaylik va o‘tmishga qaytmaylik, demoqdamiz. Endi hech narsani yashirmaylik. Hamma narsani ochiq ko‘rsataylik, soliqlarni ochiq to‘laylik. Hozircha hech kim bunday qilmagan. Men o‘zimdan boshlayman. Yaqin kunlarda qancha mol-mulkim borligini barchangiz bilib olasiz”, — dedi Japarov.
Eslatib o‘tamiz, may oyining o‘rtalarida Qirg‘izistonda “Jismoniy shaxslarning mol-mulkini ixtiyoriy ravishda legallashtirish va amnistiya qilish to‘g‘risida”gi qonun kuchga kirdi. Qonunning maqsadi Qirg‘iziston iqtisodiyotiga mahalliy va xorijiy sarmoyalarni ko‘paytirish, yashirin iqtisodiyot ulushini kamaytirish, aktivlar saqlanishi kafolatlarini ta’minlash va ularning egalarini davlat organlari ta’qibidan himoya qilishdan iborat.
Izoh (0)