Qirg‘iziston prezidenti Ar-Riyodga amaliy tashrifi doirasida Islom hamkorlik tashkilotining sakkizinchi navbatdan tashqari sammitida nutq so‘zladi. U falastinliklarning mustaqillik huquqini qo‘llab-quvvatladi. Bu haqda 24.kg xabar berdi.
Sadir Japarov uchrashuvning muhimligini ta’kidlab, favqulodda yig‘ilish Falastindagi halokatli voqealar munosabati bilan o‘tkazilayotganini aytdi.
“Qirg‘iz xalqi ushbu konfliktda yaqinlarini yo‘qotgan oilalarning hamda bir oydan ko‘proq vaqt oldin kuchaygan zo‘ravonliklar oqibatida katta talafot va jabr ko‘rgan barcha Falastin fuqarolarining qayg‘usiga sherik. Yo‘qotilgan har bir hayot katta fojiadir.
Qirg‘iziston G‘azo sektoridagi tinch aholining azob-uqubatlarini yengillashtirish uchun gumanitar yordam ko‘rsatishga tayyor. Falastinlik birodarlarimizni tashqi tajovuz va begunoh insonlarning qurbon bo‘lishiga chek qo‘yishda qo‘llab-quvvatlash, insonparvarlik yordamini ko‘rsatishda mas’ulmiz”, — dedi u.
Qirg‘iziston prezidenti G‘azo sektoridagi vaziyatni gumanitar falokat deb baholadi.
“Begunoh tinch aholining, jumladan, go‘daklar va ayollarning o‘ldirilishini qabul qilib bo‘lmaydi va xalqaro hamjamiyat tomonidan keng ko‘lamda qoralanishi kerak. Fuqarolar infratuzilmasiga, maktablar, shifoxonalar va turar joy binolariga hujum qilish nafaqat xalqaro gumanitar huquqning, balki inson huquqlarining ham jiddiy buzilishidir”, — dedi siyosatchi.
U Qirg‘iziston Falastin xalqining mustaqillik va suveren davlat yaratishga bo‘lgan qonuniy huquqlarini tan olishini ta’kidladi. Japarov falastinliklarning manfaat va istaklariga javob beradigan yagona to‘g‘ri yechim Xavfsizlik kengashi va BMT Bosh assambleyasining tegishli rezolyutsiyalarini amalga oshirish ekanini aytdi.
“Shu bilan birga, Islom Ummatimiz xalqaro hamjamiyatni ushbu tajovuzga qarshi birlashgan va yagona pozitsiyani egallashga ishontirishi va nizolashayotgan tomonlarni muzokaralarga jalb qilish bo‘yicha xalqaro saʼy-harakatlarni faollashtirishi zarur.
Nizolashayotgan tomonlar o‘z fuqarolarining hayotini himoya qilishni birinchi o‘ringa qo‘yishi va BMTning asosiy hujjatlarida mustahkamlangan xalqaro gumanitar huquqning universal qoidalarini hurmat qilishi muhim. Adolat, tenglik va inson huquqlarini hurmat qilish tamoyillari Isroil—Falastin konfliktini hal qilish yo‘lidagi harakatlarimizni belgilashi kerak”, — deya qo‘shimcha qildi Japarov.
Izoh (0)