Farg‘ona viloyatida sifati kafolatlanmagan dori vositalari chetdan noqonuniy olib kirilayotganda bojxona xodimlari tomonidan to‘xtatib qolindi. Bu haqda viloyat bojxona boshqarmasi matbuot xizmati xabar berdi.
Farg‘ona viloyati bojxona boshqarmasi Kontrabandaga qarshi kurashish bo‘limi, viloyat DXX hamda Milliy gvardiya boshqarmasi xodimlari bilan hamkorlikda o‘tkazilgan tezkor tadbirda Qo‘qon—Termiz yo‘nalishida harakatlanayotgan Isuzu yuk mashinasi Dang‘ara tumanida to‘xtatilib, belgilangan tartibda ko‘zdan kechirilgan.
Avtomashina yukxonasida xorijda ishlab chiqarilgan, sifatini va boshqa rasmiylashtiruvdan o‘tganini tasdiqlovchi hujjati bo‘lmagan dori vositalari borligi aniqlangan. Mazkur 3 turdagi 5800 dona dori vositalarining umumiy qiymati 82 million so‘mni tashkil qilgan.
Hozirda holat yuzasidan bojxona organlari tomonidan tergovga qadar surishtiruv harakatlari olib borilmoqda.
Izoh (0)