Toshkentda Xitoy tomonidan sovg‘a qilingan “gormoshkali” elektrobus qatnay boshladi

Toshkent shahrida 6-dekabrdan boshlab “gormoshkali” elektrobuslar qatnovi yo‘lga qo‘yildi, deb xabar beradi “Toshshahartransxizmat”.

Ma’lum qilinishicha, Toshkent shahri uchun xarid qilingan 200 dona o‘ta katta sig‘imli King Long rusumli avtobuslarga ishlab chiqaruvchi zavod — Xiamen King Long United Automotive Industry Co., Ltd tomonidan bonus tariqasida qo‘shimcha ravishda 2 dona King Long elektrobusi taqdim etilgan.

Hozirgi kunda King Long rusumli elektrobuslarni test sinovlaridan o‘tkazish hamda ushbu elektrobuslarni boshqaruvchi haydovchilarni o‘qitib maxsus sertifikatlar bilan taʼminlash ishlari nihoyasiga yetkazilgan. Shu munosabat bilan mazkur o‘ta katta sig‘imli elektrobuslar 6-dekabr kunidan boshlab “2-avtobus saroyi” filialiga biriktirilgan 14-sonli TTZ ASHB — Toshkent vokzali avtobus yo‘nalishida xizmat ko‘rsatishni boshlagan.

Ushbu jamoat transportlarining Toshkentga kelishi haqidagi xabarlar avgust oyi oxirida tarqalgan, biroq poytaxt uchun bunday elektrobuslarni xarid qilish haqida xabar berilmagan edi.

Aprel boshida “Yangi O‘zbekiston” bog‘ida Xitoydan olib kelingan 268 ta avtobus va elektrobuslarni topshirish marosimi bo‘lib o‘tgandi. Ushbu jamoat transporti vositalarining 101 tasi elektrobus, 109 tasi gazda harakatlanuvchi (12 metrli) avtobus, 48 tasi katta sig‘imli (“gormoshka”) avtobuslardir. Mazkur avtobus va elektrobuslar King Long va Yutong kompaniyalari tomonidan ishlab chiqarilgan.