Oliy ta’lim, fan va innovatsiyalar vazirligi “Muxtar Auezov nomidagi Janubiy Qozog‘iston universitetining Chirchiq shahridagi filialini tashkil etish to‘g‘risida”gi Vazirlar Mahkamasi qarori loyihasini muhokamaga qo‘ydi.
Quyidagilar filial faoliyatining asosiy yo‘nalishlari etib belgilanadi:
- iqtisodiyot tarmoqlari uchun zamonaviy talablar asosida xalqaro taʼlim standartlariga muvofiq yuqori malakali mutaxassislarni tayyorlash;
- taʼlim, ilm-fan hamda ishlab chiqarishning uzluksizligi va izchilligi tamoyillari, shuningdek, jahonning nufuzli o‘quv-ilmiy markazlari bilan uyg‘un integratsiyalashuv asosida mutaxassislarni, ilmiy kadrlarni tayyorlash va qayta tayyorlash tizimini yuksaltirish;
- zamonaviy bilim va ko‘nikmalarga ega mutaxassislarni tayyorlash jarayoniga ilg‘or va masofaviy texnologiyalarni keng joriy etish, yuqori malakali professor-o‘qituvchilarni va ko‘p yillik ish stajiga ega bo‘lgan amaliyotchilarni jalb etish;
- xorijiy davlatlarning yetakchi oliy taʼlim muassasalari, ilmiy-tadqiqot markazlari va biznes-hamjamiyatlar bilan uzoq muddatli hamkorlikni yo‘lga qo‘yish, rivojlantirish hamda mustahkamlash;
- ilmiy va ilmiy-pedagog kadrlarning professional mahorati darajasi va sifatini uzluksiz oshirib borish, xorijiy davlatlardagi yetakchi oliy taʼlim muassasalarida malaka oshirishini va stajirovka o‘tashini taʼminlash;
- fundamental, amaliy va innovatsion tadqiqotlar olib borish hamda ularning natijalarini amaliyotga joriy etish, ilmiy-tadqiqot institutlari bilan hamkorlikda ilmiy-texnik vazifalarni hal etishga yo‘naltirilgan amaliy va innovatsion izlanishlarni amalga oshirish.
Belgilanishicha, mazkur filial universitetning yuridik shaxs maqomiga ega bo‘lgan tarkibiy bo‘linmasi hisoblanadi. Taʼlim jarayoni O‘zbekiston davlat taʼlim standartlari talablari inobatga olingan, universitet tomonidan tasdiqlanadigan o‘quv rejalari va fan dasturlariga muvofiq Oliy taʼlim, fan va innovatsiyalar vazirligi bilan kelishilgan holda amalga oshiriladi.
Bitiruvchilariga O‘zbekistonda oliy maʼlumot to‘g‘risidagi hujjat sifatida tan olinadigan belgilangan namunadagi universitet diplomi beriladi.
Hujjatga muvofiq, 2024/2025-o‘quv yili boshlangunga qadar M.Auezov nomidagi Janubiy Qozog‘iston universiteti bilan birgalikda filial professor-o‘qituvchilarining tarkibi yuqori malakali, jumladan, 40 foiz M.Auezov nomidagi Janubiy Qozog‘iston universiteti professor-o‘qituvchilari bilan to‘ldirilishi, kutubxona fondini zamonaviy adabiyotlar bilan shakllantirilishi ta’minlanadi.
Avvalroq O‘zbekistonda prezident farmoni bilan yangi universitet tashkil etilishi, shuningdek, mamlakatda Buyuk Britaniya ta’lim dasturi asosidagi xalqaro maktab ochilishi to‘g‘risida xabar berilgandi.
Izoh (0)