“Jismoniy tarbiya va sport sohasi uchun tibbiyot kadrlarini tayyorlash hamda sportchilarga tibbiy xizmat ko‘rsatish tizimini yanada takomillashtirish chora-tadbirlari to‘g‘risida”gi prezident qarori qabul qilindi.
Qarorga ko‘ra, 2024/2025-o‘quv yilidan boshlab Toshkent tibbiyot akademiyasida “Sport shifokori” va “Sport diyetologiyasi (ovqatlanish ilmi)” bo‘yicha magistratura mutaxassisliklari joriy etiladi.
Toshkent farmatsevtika institutida “Eksperimental va sport farmakologiyasi” magistratura mutaxassisligi bo‘yicha amaldagi o‘qishga qabul qilishning davlat buyurtmasi parametrlari 2 baravarga oshiriladi.
Hujjatga asosan, O‘zbekiston davlat jismoniy tarbiya va sport universiteti huzurida tashkil etilgan tibbiyot fakulteti (“Davolash ishi” taʼlim yo‘nalishi) Toshkent tibbiyot akademiyasining Chirchiq filialiga aylantiriladi.
Filialda sport tibbiyoti va boshqa tibbiyot mutaxassisliklari (“Davolash ishi”, “Farmatsevtika”, “Pediatriya”) bo‘yicha kadrlar tayyorlanib, Chirchiq shahridagi barcha turdagi tibbiyot muassasalari unga klinik-o‘quv baza sifatida biriktiriladi.
Sport sohasida kadrlarni kompleks tayyorlash bo‘yicha “Chirchiq sport klasteri” namunasi yaratiladi.
Davlat sport-taʼlim muassasalarining sport shifokorlari, sport diyetologlari va sport farmakologlari Tibbiyot xodimlarining kasbiy malakasini rivojlantirish markazida belgilangan tartibda bepul malaka oshiradi.
Davlat rahbari tomonidan ushbu qarorda, shuningdek, 2024/2025-o‘quv yiligacha “70910233-Sport tibbiyoti” hamda “70910401-Gigiyena: nutritsiologiya” mutaxassisliklari bo‘yicha malaka talablari, o‘quv rejalari va fan dasturlari tasdiqlanishi qayd etilgan.
Bundan tashqari, qarorga muvofiq Nukus, Andijon, Buxoro va Samarqand shaharlarida Respublika sport tibbiyoti ilmiy-amaliy markazining mintaqaviy filiallari tashkil etiladi.
2024/2025-o‘quv yilidan boshlab esa sport tibbiyoti sohasidagi o‘quv dasturlari va uslubiy qo‘llanmalar bevosita Markaz ishtirokida ishlab chiqiladi.
Olti yillik ko‘rsatkichlar
Hisob-kitoblarga ko‘ra, o‘tgan olti yil ichida respublikada yoshlarni oliy ta’limga qamrab olish darajasi 9 foizdan 38 foizga oshgan. 2026-yilga borib bu ko‘rsatkich 50 foizga yetkazilishi rejalashtirilgan.
O‘zbekistonda 2016-yilda OTMlar soni 77 ta bo‘lib, talabalarning 58 ming 22 nafari bakalavriat, 5 ming nafari magistratura yo‘nalishida tahsil olgan. Bundan olti yil avval 24 ming 368 nafar professor-o‘qituvchi, 7 ming 766 nafar ilmiy darajaga ega o‘qituvchilar talabalarga dars bergan.
2022-yilga kelib yuqoridagi raqamlar ancha o‘sdi. Bu davrda mamlakatdagi OTMlar soni 122 taga ko‘payib, jami 199 tani tashkil etdi. Jumladan, Toshkent shahrida 86 ta, boshqa hududlarda 113 ta OTMlari faoliyat yuritdi. Shundan davlatga qarashli OTMlar soni 114 ta, nodavlat va xorijiy OTMlar 85 ta bo‘ldi.
Izoh (0)