3 oy ichida Uzum Market milliy marketpleysi kuniga buyurtmalar soni bo‘yicha yangi rekord o‘rnatdi, yangi omborni ishga tushirdi, geografiya va assortimentni kengaytirdi.
Savdo rekordlari
11.11 savdosining dastlabki 24 soatida o‘zbekistonliklar 130 mingdan ortiq buyurtma berishdi — bu o‘tgan yilga nisbatan 15 baravar ko‘p. Yilning asosiy savdosida mamlakat aholisi Uzum Marketda jami 618 440 ta buyurtma berdi, eng faol xaridorlar Toshkent, Samarqand va Buxorodan bo'ldi.
Hammasi bo‘lib, 3 oy ichida mamlakat aholisi milliy marketpleysda 11 milliondan ortiq tovar sotib olishdi. Buyurtmalar soni bo‘yicha go‘zallik va sog‘liq uchun tovarlar, oziq-ovqat mahsulotlari, maishiy texnika va elektronika, shuningdek uy-ro‘zg‘or buyumlari yetakchi o‘rinni egalladi.
Uzum Marketda savdolar davom etmoqda — 4 dekabrga qadar milliy marketpleysda "Kiberdushanba", ya’ni elektronika va maishiy texnikaga chegirmalar amal qiladi.
Logistika va sotuvchilar
Buyurtmalar singari sotuvchilarning soni ham osib borayotganda — faqat noyabr oyida milliy marketpleysda yana 1134 sotuvchi ro‘yxatdan o‘tgan — xizmat sifatini saqlab qolish uchun Uzum Market 18 ming kv. metr maydonga ega yangi omborni ishga tushirdi. Toshkentning Sergeli tumanida joylashgan yangi ombor 5 milliondan ortiq tovarlarni joylashtirishga imkon beradi.
Uzum Market omborlaridan tovarlar har kuni mamlakatning barcha hududlaridagi 72 ta shaharga jo‘natiladi. 3 oy ichida marketpleys jamoasi 10 ta yangi shaharda 100 dan ortiq yangi buyurtma tarqatish punktlarini ishga tushirdi. Umuman olganda, Uzum Market tarqatish punktlari tarmog‘i bugungi kunda butun mamlakat bo‘ylab soni 336 ta va mamlakatdagi eng yirik hisoblanadi.
Servislar integratsiyasi
11.11 savdosida buyurtmalarning qariyb 45% Uzum Nasiya muddatli to‘lov usuli bilan to‘langan, uni Uzum Marketda rasmiylashtirish mumkin. Oktyabr oyida marketpleys ilovasi foydalanuvchilari Uzum Tezkor orqali kafe va restoranlardan sevimli taomlarni yetkazib berishga buyurtma berish imkoniyatiga ega bo‘lishdi. Shunda, marketpleys foydalanuvchilari Uzum Tezkorga buyurtma berish uchun qayta ro‘yxatdan o‘tishlari kerak emas.
Bugun Uzum Tezkorda Toshkent va Andijondagi 700 dan ortiq kafe va restoranlardan yetkazib berish imkoniyati mavjud, noyabr oyida esa servis Makro supermarketlaridan tovarlarni ekspress-yetkazib berishni ham yo‘lga qo‘ydi.
— Biz mamlakatning millionlab aholisiga yuz minglab tovarlarni xarid qilish, tadbirkorlarga esa o‘z tovarlarini marketpleysning logistika va IT infratuzilmasidan foydalangan holda butun mamlakat bo‘ylab sotish imkoniyatini beradigan milliy platformani yaratmoqdamiz, — deydi Uzum Market bosh direktori Ilshat Xametov. — Bir yildan beri biz sekinlashmasdan butun mamlakat bo‘ylab infratuzilmani rivojlantirmoqdamiz va kelgusi yilda biz mamlakatdagi eng yirik logistika majmuasining birinchi qismini ishga tushiramiz. 2024 yilda Uzum Market buyurtma tarqatish punktlari 10 mingdan ortiq aholisi bo‘lgan mamlakatning har bir aholi punktida bo‘ladi.
Sheriklik huquqi asosida.
Izoh (0)