Олий таълим, фан ва инновациялар вазирлиги “Мухтар Ауезов номидаги Жанубий Қозоғистон университетининг Чирчиқ шаҳридаги филиалини ташкил этиш тўғрисида”ги Вазирлар Маҳкамаси қарори лойиҳасини муҳокамага қўйди.
Қуйидагилар филиал фаолиятининг асосий йўналишлари этиб белгиланади:
- иқтисодиёт тармоқлари учун замонавий талаблар асосида халқаро таълим стандартларига мувофиқ юқори малакали мутахассисларни тайёрлаш;
- таълим, илм-фан ҳамда ишлаб чиқаришнинг узлуксизлиги ва изчиллиги тамойиллари, шунингдек, жаҳоннинг нуфузли ўқув-илмий марказлари билан уйғун интеграциялашув асосида мутахассисларни, илмий кадрларни тайёрлаш ва қайта тайёрлаш тизимини юксалтириш;
- замонавий билим ва кўникмаларга эга мутахассисларни тайёрлаш жараёнига илғор ва масофавий технологияларни кенг жорий этиш, юқори малакали профессор-ўқитувчиларни ва кўп йиллик иш стажига эга бўлган амалиётчиларни жалб этиш;
- хорижий давлатларнинг етакчи олий таълим муассасалари, илмий-тадқиқот марказлари ва бизнес-ҳамжамиятлар билан узоқ муддатли ҳамкорликни йўлга қўйиш, ривожлантириш ҳамда мустаҳкамлаш;
- илмий ва илмий-педагог кадрларнинг профессионал маҳорати даражаси ва сифатини узлуксиз ошириб бориш, хорижий давлатлардаги етакчи олий таълим муассасаларида малака оширишини ва стажировка ўташини таъминлаш;
- фундаментал, амалий ва инновацион тадқиқотлар олиб бориш ҳамда уларнинг натижаларини амалиётга жорий этиш, илмий-тадқиқот институтлари билан ҳамкорликда илмий-техник вазифаларни ҳал этишга йўналтирилган амалий ва инновацион изланишларни амалга ошириш.
Белгиланишича, мазкур филиал университетнинг юридик шахс мақомига эга бўлган таркибий бўлинмаси ҳисобланади. Таълим жараёни Ўзбекистон давлат таълим стандартлари талаблари инобатга олинган, университет томонидан тасдиқланадиган ўқув режалари ва фан дастурларига мувофиқ Олий таълим, фан ва инновациялар вазирлиги билан келишилган ҳолда амалга оширилади.
Битирувчиларига Ўзбекистонда олий маълумот тўғрисидаги ҳужжат сифатида тан олинадиган белгиланган намунадаги университет дипломи берилади.
Ҳужжатга мувофиқ, 2024/2025-ўқув йили бошлангунга қадар М.Ауезов номидаги Жанубий Қозоғистон университети билан биргаликда филиал профессор-ўқитувчиларининг таркиби юқори малакали, жумладан, 40 фоиз М.Ауезов номидаги Жанубий Қозоғистон университети профессор-ўқитувчилари билан тўлдирилиши, кутубхона фондини замонавий адабиётлар билан шакллантирилиши таъминланади.
Аввалроқ Ўзбекистонда президент фармони билан янги университет ташкил этилиши, шунингдек, мамлакатда Буюк Британия таълим дастури асосидаги халқаро мактаб очилиши тўғрисида хабар берилганди.
Изоҳ (0)