Andijon viloyati Oltinko‘l tumanida o‘qishni ko‘chirib berish bilan bog‘liq firibgarlik holati fosh etildi, deb xabar beradi Bosh prokuratura huzuridagi departament.
Ma’lum qilinishicha, departamentning Oltinko‘l tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda J.Z. ismli shaxs fuqaro A.Y.ning ishonchiga kirib, uning qo‘shni Qirg‘izistonning O‘sh davlat universitetidagi o‘qishini Andijon qishloq xo‘jaligi va agrotexnologiyalar institutiga ko‘chirib berishi evaziga 1,5 ming dollarni firibgarlik yo‘li bilan olgan vaqtida daliliy ashyolar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Buxoro va Farg‘ona viloyatlarida o‘qishni ko‘chirib berish bilan bog‘liq firibgarlik holatlariga chek qo‘yilgandi. Shuningdek, O‘zbekistonning qator hududlarida o‘qishga kiritib qo‘yish uchun pul olgan OTM xodimlari qo‘lga tushgan edi.
Izoh (0)